PİK-terge KÖMEK KÖRSETEDI
Bas şaharymyzda sänı men säuletı kelısken köp qabatty üiler az emes. Olardyŋ özındık tüiındı mäselelerı de barşylyq. Solardyŋ bırı – tūrǧyndar men PİK basşylary arasynda bolatyn kelıspeuşılıkter. Mıne, osyndai kikıljıŋder tuyndasa, ony qalai şeşuge bolatyny jönınde elorda PİK-terı qauymdastyǧynyŋ töraǧasy Mizambek Kenjebaev äŋgımeleidı.
– Atalǧan qauymdastyqty qūrǧandaǧy maqsattaryŋyz ne?
– Bızdıŋ PİK qauymdastyǧyn qūrudaǧy basty maqsatymyz – PİK töraǧalary arasynda QR «Tūrǧyn üi qatynastary» zaŋyna bailanysty, onymen jan-jaqty tanysu jönınde tüsınık jūmystaryn jürgızu. Sonymen qatar, päter ielerı men PİK töraǧalarynyŋ arasynda bolatyn dau-damailardy retteuge tyrysamyz. Olarǧa zaŋdyq tūrǧyda kömekter körsetemız. Atap aitqanda, kondominiumdy tırketu üşın qyruar qarjy kerek bolyp, qinalatyn jaǧdaida bız ondai köp şyǧyn şyǧarmai-aq tırketuge qol ūşyn sozamyz. Būdan bölek, PİK-terge zaŋdyq kömek retınde şaǧyn kıtapşalar basyp şyǧaramyz. Mügedekterdıŋ ötınışterın de jerde qaldyrmai, qūlaq asyp otyramyz.
– PİK-terdıŋ jūmysyna baqylau jasaisyzdar ma?
– Bız olarǧa baqylau jasau üşın emes, qol ūşyn beru üşın qūrylǧanbyz. Negızı, PİK töraǧalaryn tūrǧyndardyŋ özı jalpy jinalystarynda sailaidy. Menıŋşe, töraǧa öte ısker, qūrylys pen injenerlık salany jaqsy bıletın adam bolǧany dūrys. Sonda ǧana PİK-tıŋ jūmysy tez jandanady. Rasy kerek, bızde PİK töraǧalary tūrǧyndardyŋ päterlerınıŋ är şarşy metrı üşın tölenetın jarnalaryn jyldar boiy tölemei, zärezap etetınderın aityp, jiı şaǧymdanady. Al, aqşa tölemegen jerde jūmys qalypty jürgızılmeitını belgılı. Öitkenı, santehnik, aula sypyruşy, eden juuşy siiaqty jūmysşylardy ūstau üşın de olarǧa uaqytynda eŋbekaqysyn berıp tūru kerek. Ony töraǧa tek sol tūrǧyndardan tüsken aqşadan beredı.
– Tūrǧyn üidıŋ kıreberısın, töbesın, jertölesın kım jöndeidı?
– Eger tūrǧyndardyŋ barlyǧy jarnalaryn uaqytynda tölep tūrsa, PİK-terdegı käsıbi mamandar jöndeuı tiıs. Qazır tūrǧyn üi-kommunaldyq şaruaşylyǧyn jaŋǧyrtu baǧdarlamasy boiynşa būl mäsele köpşılık jerde oŋ şeşımın tauyp ta jür. Al jalpy
üi qajettılıgıne jūmsalatyn elektr quatyn PİK tölei me, älde tūrǧyndar «Astanaenergosbytqa» tıkelei tölei me degen mäselege keletın bolsaq, qalai töleseŋız de sız ūtylmaisyz. Öitkenı, Ükımettıŋ 2000 jylǧy №1822 qaulysynda PİK töleuı tiıs dep körsetılgenımen, QR «Tūryn üi qatynastary turaly» zaŋda jalpy üi mūqtajdyǧyna qajettı şyǧyndardy tūrǧyndardyŋ özı töleidı dep körsetılgen. Sondyqtan, qalai tölense de, ol dalaǧa ketpeidı. Öz üiıŋızdıŋ müddesı üşın jūmsalady.