Qazır kımnen sūramaŋyz, özınıŋ saiasatqa jäne el Prezidentıne qatysty jeke pıkırın bıldıre alady. Olar oiyndaǧysyn tura aita ma, joq pa, öz erkınde. Al, qaşanda aǧynan jarylyp, oiyn bükpesız bıldıretınder – balalar.
Büldırşınder Elbasy Nūrsūltan Nazarbaevtyŋ saiasi arenadaǧy orny men kün saiyn qol qoiatyn qūjattaryn onşa tüsıne bermeidı. Olar üşın Prezidenttıŋ bır ǧana aty bar, ol – Nūrsūltan ata. Barlyǧy Prezidenttı mektepter men balabaqşalarda ılınıp tūratyn portretınen jaqsy tanidy. Onyŋ Astana degen qalada, «Bäiterekke» jaqyn jerde tūratynyn bıledı. Sondyqtan köpşılıgı salǧan suretterınde «Bäiterektı» jiı beineleidı jäne «öskende el basqaram» dep şyǧarma jazady.
Bır joly teatrǧa barmaq bolyp, taksige otyrǧanmyn. Jürgızuşı tym äŋgımeşıl ärı äserşıl jan eken. «Ömırımdegı eŋ bır qyzyq uaqiǧany aityp bereiın be?» dedı. Erıksız bas şūlǧydym. «Ülken balamdy şetqaqpailap tärbielegendıkten be, ol tym ūiaŋ bolyp östı. Al, keiıngı ūlym eşkımge boi bermeidı. Özı – aqyldy tentek.
Osydan bıraz jyl būryn otbasymmen bırge elordada ötken ülken merekege bardym. Adam yǧy-jyǧy, ūlymdy qolynan tas qyp ūstap alǧanmyn. Bır kezde adamdardyŋ bärı artqa qarai şegınıp jatqanyn baiqadym. Däl sol sätte balam qolyn jūlyp alyp, alǧa qarai jügırıp kettı. Eşteŋe tüsınbegen küiı artynan qarasam, anadai jerde Prezident kele jatyr eken. Oqqaǧarlardan söz estımes üşın balama qarai ūmtylyp edım, olar menıŋ bır orynda tūruymdy ötındı. Baqsam, ūlym eş qymsynbastan, Elbasyna qarai alşaŋ basyp barady. Nūrsūltan Äbışūly balamdy bırden baiqap, säl eŋkeiıŋkırep, ony qūşaǧyna basty. Qatty quanǧanym sonşa, sol bır erekşe sättı suretke tüsıru de oiyma kelmeptı. Ūlym älı künge deiın «men Nūrsūltan atamen kezdeskenmın» dep jiı aitady».
Nūrsūltan atasymen kezdesken taǧy bır balaqaidyŋ aty-jönı – Erjan İsabaev. Elbasyn 2 jasynda Qaskeleŋdegı Nauryzbai batyr eskertkışınıŋ aşylu saltanatynda körgen Erjan byltyr oǧan hat jazdy. Ol hatynda Prezidenttı özınıŋ tuǧan künıne qonaqqa şaqyrǧan. Sondai-aq, «eger, sızge qandai da bır kömek qajet bolsa, aityŋyz. Bız, aǧam Nūrjan ekeumız ärqaşan sızge kömektesuge daiynbyz» deudı de ūmytpaǧan. Arada köp uaqyt ötpei, Elbasynyŋ jauabyn alǧanda Erjannyŋ quanyşynda şek bolmapty. Hatta «Erjan, Otandy süiıp, oǧan qyzmet etu zor baqyt ekendıgın esıŋde saqta!» delıngen. Sonymen qatar, Elbasy Erjanǧa «endıgı joly hatty qazaqşa jazatyn bol!» dep eskertu jasaǧan eken.
2005 jyldyŋ säuır aiynda Nūrsūltan Äbışūlynyŋ Qyzylorda oblysy, Aral audanyna jasaǧan saparynda mynadai qyzyq uaqiǧa bolǧan-dy. Äldebır aqsaqal jaqynda ǧana dünie esıgın aşqan nemeresıne Prezidenttıŋ atyn qoiǧysy keletının aitty. Sonda Nūrsūltan Äbışūly «elımızde Nūrsūltandar köp qoi. Nemereŋızdıŋ atyn men qoiaiyn, Aisūltan bolsyn!» degen edı. Aisūltan qazır özıne Elbasy qoiǧan esımmen maqtanady.
Biyl jazda elordaǧa Oraldan qūrbymnyŋ Nūrdäulet esımdı ınısı keldı. «Nege keldıŋ?» dep sūrasaq, «Nūrsūltan atany ızdep keldım» deidı. Astananyŋ tuǧan künınde anasymen bırge «Han Şatyrǧa» bardy. Keş batqanda, «Prezidenttı taba almadym» dep mūŋaiyp keldı. Ertesıne «Bäiterekke» bardy. Nūrsūltan atasy ol jerde de joq bolyp şyqty. Sosyn Nūrdäulet özın «atam özıne ädemı kostium alu üşın dükenge ketken bolar» dep jūbatty. Eŋ qyzyǧy, ol Aqordany Elbasynyŋ tūratyn üiı dep oilaidy. Kelesı joly Aqordaǧa qonaqqa baram dep otyr…
Kördıŋız be, bala köŋıl özınıŋ armandaryna qaltqysyz senedı. Balabaqşadaǧy büldırşınderdıŋ bırı ǧaryşker, endı bırı prezident bolǧysy keledı. Olar «Älıppenıŋ» alǧaşqy betıne tılek jazǧan Nūrsūltan atalaryna elıkteidı. Keibıreuı «eger, men Prezident bolsam, barşa janǧa kämpittı tegın taratatyn edım» dep qazırden şyǧarma jazyp jür.
Aqordanyŋ «İnstagramdaǧy» akkauntynda Elbasy Nūrsūltan Nazarbaevtyŋ balabaqşa, mektep, lager, saiabaqtarǧa barǧanda balalarmen tüsken suretı jiı jariialanady. Suretterde barǧan jerınde külımdei qol būlǧap jüretın Prezidentımızdıŋ özınıŋ erekşe aurasymen baldyrǧandardy bırden baurap alatyny baiqalady. Endeşe, balaqailardyŋ qai-qaidaǧy oidan qūrastyrylǧan keiıpkerlerdı emes, köz aldynda jürgen körkem kısını ülgı etkenı de qisyndy siiaqty.
