Qazaqstan Premer-ligasy 15-turynyŋ basty oiyny Almatynyŋ Ortalyq stadionynda «Qairat» pen «Astana» komandalarynyŋ arasynda öttı.
«Astanadan» köş keiın qalyp bara jatqan almatylyqtardyŋ osy joly araqaşyqtyqty qysqartuǧa mümkındıgı boldy. Bıraq «Qairattyŋ» oǧan qauqary jetpei, bır qainauy kem şyqty.
Elordalyqtar oiyndy basty sūrmergenı Patrik Tvumasisyz bastady. Onsyz «Astananyŋ» alǧy şebı aqsap qaldy dep aituǧa kelmes. Qos komanda da ä degennen alǧa ūmtylyp, şabuyldaryn üdete tüstı. Aldymen eseptı «Qairat» aşty. 32-minutta İslambek Quat alystan şırene tartyp, Nenad Erich küzetken qaqpanyŋ toǧyzdyǧyn top etkızdı. Būdan keiın Baqtier Zainutdinov ta közge tüsetındei tamaşa sät tuyp edı, onysyn golǧa ainaldyra almady. Degenmen, köp ūzamai bırınşı taimda-aq tarazy basy teŋestı.
Kliainhaisler Laslonyŋ äueletken dobyn Djordje Despotovich döp tüsırdı. Ekınşı taimda qonaqtardyŋ ekpını küşeiıp, oiyn tızgının ūstady. Al alaŋ ielerı qarsy şabuylǧa iek artty. Nätijesınde 88-minutta Quattyŋ golyna naǧyz jauap retınde Roman Mūrtazaev qaqpaǧa qaşyq jerden keremet gol soqty. Söitıp 2:1 esebımen «Astana» taǧy da «Qairattan» asyp tüstı.
«Astana» turnir kestesındegı ūpaiyn 43-ke arttyryp, «Qairatty» 35 ūpaimen qaldyrdy.
Turdyŋ qalǧan kezdesulerınde «Ordabasy» «Aqjaiyqty» 2:1, «Jetısu» «Qyzyljardy» 2:1, «Şahter» «Atyraudy» 3:0 esebımen jeŋdı. Al «Ertıs» «Qaisarǧa» 0:1, «Tobyl» «Aqtöbege» 2:3 esebımen ese jıberdı.
Orynbek ÖTEMŪRAT
