Bügınnen bastap qala ışınde qatynaityn bırqatar avtobus jüru baǧdarlary özgeredı. Sondai-aq, 104 jäne 130 baǧyttarǧa jüretın şaǧyn avtobustar ülken avtobustarǧa auystyrylady. Salaǧa jauapty mamandardyŋ aituynşa, sonyŋ esebınen jolauşylarǧa körsetıletın qyzmet sapasy joǧarylaidy, bırın-bırı qaitalaityn baǧdarlar sany azaiady, avtobus jürgızuşılerınıŋ alaşapqyna toqtau salynady.
Atalmyş qadam elordadaǧy qoǧamdyq kölık qozǧalysy jüiesın jaŋǧyrtu baǧdarlamasynyŋ aiasynda jüzege asyrylady. Jalpy, jaŋǧyrtu üş kezeŋge bölınıp otyr. Alǧaşqy ekı kezeŋı osy jazda atqarylsa, soŋǧysy küzde bastalady.
Qazırgı taŋda Astanada 52 baǧdar tırkelgen. Bügın olardyŋ 26-sy özgertıledı. Al, jaŋǧyrtu jūmysy aiaqtalǧan soŋ baǧdarlar sany 60-qa deiın jetpek. Sondai-aq, bügın alǧaşqy aialdamadan mıngen jolauşynyŋ soŋǧy aialdamaǧa jetkenşe 90 minut uaqyty ketse, jaŋǧyrtudan keiın būl aralyqty 65 minutta jürıp öte alady.
– Bız elordadaǧy qoǧamdyq kölık qozǧalysyn jaqsartu üşın keşendı jūmystar atqarudamyz. Būl jūmystarǧa marşruttyq jüienı qaita qūru, jyljymaly qūramdy jaŋartu, jürgızuşıler men konduktorlardyŋ bılıktılıgın arttyru, jol aqysyn elektrondy jüiege köşıru, elektrondy dispetcherlık pen elektrondy aqparattandyru qyzmetterın jäne kölıktı baqylau qyzmetın qūru kırıp otyr, – deidı qalalyq Jolauşylar kölıgı jäne avtomobil joldary basqarmasy basşysynyŋ orynbasary Äbdıhamit Tamabaev.
Baǧdarlardy jaŋǧyrtudyŋ tūjyrymdamasyn äzırleuge halyqaralyq «TYPSA» kompaniiasynyŋ halyqaralyq keŋesşılerı tartyldy. Sarapşylar qaladaǧy baǧdarlarǧa, jolauşylar aǧymyna zertteu jürgızdı. Qoǧamdyq kölıktı paidalanatyn adamdar sanyn anyqtap, äleumettık saualdama ötkızdı. Saualdamaǧa 35 myŋnan astam adam qatysty.
Onyŋ qorytyndysynda jolauşylarǧa tiımdı jaŋa baǧdarlar anyqtaldy. Sondyqtan jaŋa baǧdarlar qala tūrǧyndarynyŋ 85 paiyzynyŋ köŋılınen şyǧady degen boljam jasaldy.
Jaŋǧyrtudyŋ qalǧan ekı kezeŋı «LRT» jeŋıl relstı kölık jüiesınıŋ engızıluıne jäne 2030 jylǧa deiın paidalanuǧa berıletın ırı äleumettık nysandardyŋ qūrylysyna säikes elordanyŋ ösuın esepke alyp jürgızıledı.
Jalpy, «Astana LRT» JŞS jolauşylar kölıgı bölımınıŋ basşysy Beibıt Esjanovtyŋ mälımdeuınşe, qazırgı taŋda elordaǧa jaŋa 310 avtobus jetkızıldı, taǧy 48 avtobus aǧymdaǧy jyldyŋ qazan aiyna deiın keledı.
– Şıldenıŋ 11 künı jaŋa «Iveco citylis» markaly avtobustardyŋ 241-ın baǧdarlarǧa jıberu közdelgen. 34 avtobustyŋ ūzyndyǧy – 18 metr, qalǧany 12 metr bolady. Barlyq avtobustar jeldetu jäne beinebaqylau jüielerımen qamtamasyz etılgen, – deidı ol.
Onyŋ aituynşa, biyl elordaǧa jalpy alǧanda 358 jaŋa avtobus keledı. Kelesı jyly qosymşa 200-250 qoǧamdyq kölık satyp alynyp, 2017 jyly elordanyŋ avtobus parkı taǧy 350 avtobuspen tolyqtyrylady. Osylaişa qaladaǧy avtobus parkı äjeptäuır jaŋaryp, eskı avtobustar ainalymnan şyǧarylady. Standart boiynşa 14 jyldan asqan avtobustardy tasymaldauǧa jıberuge
tyiym salynǧan.
«Astana LRT» JŞS kölık bölımınıŋ direktory Rustam Halilevtıŋ sözıne sensek, Bögenbai batyr, N.Tılendiev jäne B.Momyşūly daŋǧyldarynda aǧymdaǧy jyldyŋ tamyz aiynda qoǧamdyq kölıkterge arnalǧan qosymşa jolaqtar jasalmaq. Al, biylǧy qaraşadan bastap avtobustarda bilet satudyŋ elektrondy jüiesı jūmys ıstei bastaidy.
Amanǧali QALJANOV
