Elımızdıŋ ekı öŋırı – Astana qalasy men Almaty oblysynda tūrmystyq qatty qaldyqtardy öŋdeu boiynşa pilottyq joba ıske qosyldy. Tiıstı memorandumǧa elorda äkımı Äset İsekeşev jäne Almaty oblysynyŋ äkımı Amandyq Batalov qol qoidy.
EKSPO qalaşyǧynda ötken kezdesudıŋ basty maqsaty – älemdegı eŋ ozyq tehnologiialardy qoldana otyryp, qaldyqtardy tiımdı basqaratyn aimaqtyq innovasiialyq jüienı qūru. «Operator ROP» kompaniiasymen bırıgıp jasalatyn baǧdarlamanyŋ eŋ özektı mäselesı – tūrmystyq qaldyqtardy şyǧaratyn kölıktıŋ qozǧalysyn baqylaityn aqparattyq jüienıŋ engızıluınde.
– EKSPO körmesı – qalanyŋ damuyna septıgın tigızetın aldyŋǧy qatarly tehnologiialardy engızu üşın taptyrmas mümkındık. Elbasy ärqaşan ekologiia mäselesın de, qaldyqtardy tiımdı ärı qauıpsız öŋdeudı de jıtı baqylauda ūstaidy. Sondyqtan qala äkımdıgı elordadaǧy qaldyqtardy basqaru jüiesın jetıldırudı qolǧa alyp jatyr. Būl qaldyqtardy sūryptaudan bastap, olardy innovasiialyq tehnologiialar negızınde öŋdeuge deiın qadaǧalaityn baǧdarlama, – dedı alqaly jiynda söz alǧan Astana qalasynyŋ äkımı Äset İsekeşev.
Qala basşysynyŋ aituynşa, bügıngı taŋda qaldyqtardy basqaru jüiesı älemde joǧary qarqynmen damyp keledı. «Būl taqyrypqa qatysty EKSPO aiasynda on şaqty kezdesu ūiymdastyrdyq. Finliandiia, Germaniia, İtaliia syndy elderdıŋ osy saladaǧy täjıribesımen tanysyp, ädısterın zerttep jatyrmyz» dedı ol.
– Astanada qabyldanǧan baǧdarlamaǧa qaldyqtardy jinau, tasymaldau, öŋdeu jäne poligonǧa kömu kıredı. Qala aumaǧy 24 aimaqqa bölınıp, ärbıreuınde 10 myŋnan astam qoqys jäşıgı ornatyldy. Kün saiyn myŋdaǧan tonna tūrmystyq qatty qaldyqty şyǧaru üşın 70 arnaiy tehnika jūmyldyrylady.
Äset İsekeşev baǧdarlama ekı kezeŋde jüzege asatynyn jetkızdı. Bırınşı kezeŋ osy jyly qaldyqtardy öŋdeu keşenderın qosymşa tehnologiialardyŋ kömegımen jaŋartuǧa arnalsa, ekınşı kezeŋde 2019 jylǧa qarai organikalyq qaldyqtardy aşytu men qoqys gazyn qaita öŋdeu arqyly qaita öŋdeu tereŋdıgın 75 paiyzǧa deiın köbeitu közdelgen.
Güldana TALǦATQYZY
