Elordada qar tazalau jūmystary qyzu jürgızılıp jatyr. Osy maqsatqa kün saiyn myŋnan astam tehnika men jūmysşylar jūmyldyrylady.
Biylǧy qys aldyŋǧy jyldarmen salystyrǧanda edäuır jyly bolǧanmen, qarly. Aragıdık jauyp jatqan aq ūlpa qala tūrǧyndary men kölık qozǧalysyna kedergı keltırmes üşın kommunaldyq şaruaşylyq qyzmetkerlerı qar tazalau jūmysyn ırkılıssız atqaruda. Osylaişa bırınşı kezekte ortalyq köşeler, jaiau jürgınşıler joly men aialdamalardyŋ maŋy tazalanyp jatyr.
İä, soŋǧy kezderı qalanyŋ kommunaldyq qyzmet mekemelerınıŋ jūmysşylaryna tynym joq. Özderıne jüktelgen jūmysty uaqytynda atqaru üşın olar uaqytpen sanaspai eŋbek etude. Öitkenı jauǧan qar jerde jata berse taptalyp, keiın ony jinau da oŋaiǧa soqpaityny belgılı. Qar qalyŋdaǧan saiyn jūmys ta auyrlai tüsedı. Al būl tehnikanyŋ būzyluyna, keide tıptı ısten şyǧuyna äkelıp soǧuy mümkın. Sondyqtan qai jūmysty bolsyn uaqytynda atqarǧan jaqsy.
Almaty audany äkımdıgınıŋ öndırıstık-tehnikalyq bölım basşysy Aslan Biseǧūlovtyŋ aituynşa, atalmyş audan aumaǧynda qar tazalau jūmysy, ädettegıdei, qarqyndy jürgızılıp jatyr. Keşe audan boiynşa barlyǧy 177 tehnika jūmyldyrylyp, 448 adamnyŋ küşımen poligonǧa 4308 şarşy metr jerdıŋ qary şyǧaryldy. Audan aumaǧyndaǧy tehnika ötken tünde – 221, al kündız 350 reis jasaǧan.
– Qazır joldardy tazartu – maŋyzdy mındettıŋ bırı. Tünde temperatura tömendegen kezde jolǧa qabyrşyq mūz qatyp, taŋerteŋ qala tūrǧyndaryna köptegen qiyndyq tuǧyzuy mümkın. Osyndai keleŋsızdıkterdıŋ aldyn alu üşın jūmysşylar kün-tün demei auysymmen jūmys ısteidı. Joldy tazartu jūmystary keşıktırılse, būl qaladaǧy jol qozǧalysyna kedergı keltıredı. Sondyqtan bız jūmystyŋ sapasyn erekşe qadaǧalaimyz, – dedı A.Biseǧūlov.
Qala aumaǧyn qalyŋ qardan tazalau jūmystaryna Esıl audany boiynşa 308 tehnika men 596 jol jūmyskerı jūmyldyrylyp, olar barlyǧy 4850 şarşy metr jerdıŋ qaryn tazalady.
Baiqoŋyr audanynda soŋǧy künderı barlyǧy 309 jūmysşy men 245 maşinanyŋ küşımen 4842 şarşy metr jerdıŋ qary şyǧaryldy.
Saryarqa audanynyŋ jūmysşylary bolsa bır künde tehnikamen 492 reis jasap, 6972 tekşe metr jerdıŋ qaryn tazalady. Būl jūmystardy atqaruǧa audan boiynşa 88 arnaiy tehnika jäne 444 jūmysşy jūmyldyryldy.
Qala aumaǧynan qar şyǧaru barysynda köşe qaptaldarynda keptelıstı boldyrmau basty nazarǧa alynyp otyr.
Mamandardyŋ aituynşa, qar tazalau jūmystarynda kündızgı uaqytta kedergıler köp kezdesedı eken. Al tüngı uaqytta jūmys ısteudıŋ öz artyqşylyqtary bar: maşinalar az, tiısınşe qozǧalys ta köp emes.
Barlyq audandarda janar-jaǧarmaidyŋ qory jetkılıktı, avtokölıktıŋ üzdıksız jūmysy jäne qozǧalys qauıpsızdıgın qamtamasyz etu boiynşa jedel şaralar qabyldau üşın dispetcherlık qyzmetter qūrylǧan, mehanikter brigadasy tūraqty jūmys ısteidı.
Jalpy qar tazalau jūmystary boiynşa qala tūrǧyndary täulık boiy «109» nömırı arqyly iKomek monitoring jäne jedel äreket etu ortalyǧyna qoŋyrau şalyp, habarlasa alady.
Gülbarşyn ÖKEŞQYZY
