Qaraǧandy oblysy elordanyŋ 20 jyldyq mereitoiyna aşyq aspan astyndaǧy mūrajai men «Qazaq elıne myŋ alǧys» atty monument syilaidy. Būl turaly oblys äkımı Erlan Qoşanov Astanadaǧy Ortalyq kommunikasiialar qyzmetınde ötken brifing barysynda mälımdedı.
– Bır aidan soŋ bız Astananyŋ 20 jyldyq mereitoiyn atap ötemız. Qaraǧandylyqtar elordaǧa syilyq äzırlep otyr. Ol – «Ūlytau» alleiasy men «Qazaq elıne myŋ alǧys» atty monument. Alleia Ūlytaudyŋ basty körıktı nysandaryn köruge bolatyn aşyq aspan astyndaǧy mūrajai retınde bolady. Basty tosynsyi Ämır Temırdıŋ jazuy basylǧan Altyn Şoqy döŋınıŋ basynda bolǧan tastyŋ köşırmesı bolmaq. Ol tastyŋ tüpnūsqasy Ermitajda saqtalǧan.
– Ǧalymdar tas taqta 1391 jyly Ämır Temırdıŋ Altyn Ordaǧa şyqqan ataqty joryǧy kezınde ornatylǧan degen boljam jasauda. Jäne de ol artefaktınıŋ köşırmesı alǧaş ret köpşılıkke qoljetımdı jerde qalyŋ halyq nazaryna ūsynylmaq. Sondai-aq, alleiada tarihy 4 myŋnan astam jylǧa tereŋdeitın Terektı-Äulie jäne Baiqoŋyr petroglifterı oryn alady, – dedı aimaq basşysy.
«Qazaq elıne myŋ alǧys» monumentı qazırgı taŋda Qaraǧandy körkemöner kombinatynda jasalyp jatyr. Ol quǧyn-sürgın zamanynda Qazaqstanǧa jer audarylǧan köptegen ūlt ökılderın bauyryna basqan qazaq halqynyŋ meiırımdılıgın beineleidı. Atalǧan nysandardy tūrǧyzuǧa oblystaǧy käsıpkerler demeuşılık körsetude.
