Qazaq boksy – ūlttyq brendımız

Astanada Qazaqstan boksynyŋ 85 jyldyǧy atalyp ötıldı. Boks, bıle bılsek, qazaqtyŋ oŋ jambasyna qonǧan, ūlttyq sportyna balanǧan öner desek te jarasady. Qazaqstan bylǧary qolǧap şeberlerı älemdık deŋgeidegı bairaqty bäsekelerden qūralaqan qaitqan emes. Serık Qonaqbaev, Viktor Demianenko, Vasilii Jirov, Bekzat Sattarhanov, Ermahan Ybyraiymov, Baqtiiar Artaev, Baqyt Särsekbaev, Serık Säpiev, Daniiar Eleusınov syndy şarşy alaŋnyŋ şeberlerı şyn mänınde halqymyzdyŋ maqtanyşy bolyp sanalady.

Sport älemınıŋ şyŋy – Olim­piada oiyndarynan Qazaqstan boksşylarynyŋ 7 altyn, 6 kümıs, 11 qola medal alǧany, sonymen qatar üş qazaqstandyq bylǧary qolǧap şeberınıŋ «Barker kubogynyŋ» iegerı bolǧany el sportynyŋ mereiın üstem etkenı aiqyn. Sondai-aq älem chempionattary men qūrlyq bırınşılıkterınde de qazaq boksşylary köptegen jüldege qol sozdy. Älemdık şarşy alaŋda kök tuymyzdy kökke kötergen boksşylarymyz halqymyzdyŋ maqtanyşyna ainalyp jür. Mūndai körsetkış basqa sport türlerınen äzırge bolǧan emes.
El sportynyŋ biık körsetkışıne elordamyz Astana qalasynyŋ qosyp jatqan ülesı de aitarlyqtai. Kezınde KSRO bırınşılıkterı men halyqaralyq jarystarda olja salǧan Roman Kasper, Vasilii Skub, Tagir Aitbaginov, Nikolai Kumpan, Kamil Habibrahmanov, aǧa­iyndy Berık, Erık jäne Ermek Marjyq­paev, Mäulen, Mūrat jäne Marat Mūstafinder, Janat, Qairat jäne Marat Manaşevter, Abylai İskakov, Ramazan Tülkıbaev, Erkın Bekseiıtov, Aqylbek Nūrmaǧanbetov, Bauyrjan Taŋjaryqov, Bolat Abdrahmanov, İslam Goigov jäne basqa da jıgıtter salǧan aqjoltai ızdı keiıngı tolqynmen kelgen jastar da sätımen jalǧas­tyra bıldı.
Qazaqstan ūlttyq qū­ramasy sapynda el namysyn qorǧaǧan elordalyq Daniiar Eleusınov, Gennadii Golovkin, Vasilii Levit, Merei Aqşalov, Marina Volnova, Läzzat Küngeibaeva, Valentina Halzova, Qanat Abutalipov, Jeŋıs Nūrǧojin, Nūrjan Kärımjanov, Iliias Süleimenov, Daniiar Tölegenov, Azat Mahmetov, Rahat Marjyqpaev, Sadriddin Ahmedov, Nūrbek, Aibek Oralbailar jäne basqa da boksşylar Olimpiada oiyn­darynan bastap, älem chempionattary men Aziia dodalarynda top jardy. Osy boksşylar arasynan Olimpiada oiyndarynyŋ bır chempiony, ekı kümıs jäne bır qola jüldegerı, segız älem chempiony şyqty.
Ärine, sportşynyŋ jeŋımpaz boluy köp rette közge körıne bermeitın bapkerlerdıŋ eŋbegıne bailanysty bolatyny belgılı. Jaqsy jattyqtyruşy je­ŋıske jol salatyn negızdı qalaidy. Būl rette būrynǧy Aqmola men bügıngı Astananyŋ boksyn örge süiregen maitalman bapkerler de jetkılıktı. Būl rette Qanbek Baiǧūlov, Sergei Turchak, Anatolii Ten, Janat Manaşev, Berık Marjyq­paev, Marat Eleusınov, Mäulen Mūstafin, Vladimir Kamaşov, Beibıt Masabaev jäne basqa da bapkerlerdıŋ esımı ülken qūrmetpen atalady.
İä, älemdegı üzdık qūramalardyŋ aldyŋǧy qatarynan körınıp jürgen Qazaqstan boksynyŋ mereiı üstem bola beretınıne qazaq janküierı senımmen qaraityny sözsız.