Bügın, 29 qyrküiek künı saǧat 19.00-de Kongress-holda asa körnektı kompozitor Latif Hamididıŋ tuǧanyna 110 jyl toluyna arnalǧan «Qazaq valsı» atty konsert ötedı. Keşke QSRO halyq ärtısı, QR Eŋbek Erı, Memlekettık syilyqtyŋ iegerı Bibıgül Tölegenova qatysady.
Astana qalasy memlekettık akademiialyq filarmoniiasynyŋ qazaq orkestrı muzykamen süiemeldeitın konsertte atalmyş öner ūjymynyŋ kameralyq hory men «Şalqyma» halyq bi ansamblı de öner körsetedı.
Latif Hamidi – qazaq muzykasyna mol olja salǧan kompozitor. Ol qazaqtyŋ halyq änderı men küilerın jinap, notaǧa tüsıruımen qatar talai tamaşa tuyndylardyŋ avtory atandy. Ahmet Jūbanovpen bırge «Abai», «Tölegen Toqtarov» operalaryn jazdy. «Jambyl» operasy da – Hamididıŋ tuyndysy. Al kompozitordyŋ «Qazaq valsı» jäne «Būlbūl» änderı – än önerıne qosylǧan şoqtyǧy biık tuyndylar. Būl şyǧarmalar Bibıgül Tölegenovanyŋ jūldyzy januyna septıgın tigızdı desek, artyq aitqandai bolmaspyz. Konsertke kelseŋızder, atalǧan änderdı süiıktı änşıŋızdıŋ oryndauynda tyŋdap, qūlaq qūryşyŋyzdy qandyrasyzdar.
