Qazaqstandy şeteldık turister tanuy üşın ne ısteu kerek? El brendın qalaişa ūtymdy qalyptastyruǧa bolady? Saiahatqa qatysty sapaly kontenttı jasauda media ökılderı qandai täsılderdı qoldanǧany jön? Būl sūraqtar keşe Astanada ötken «Travel Media Talks» halyqaralyq forumy aiasynda talqylandy.
Jiyn barysynda söz alǧan ūlybritaniialyq jurnalist ärı kreativtı prodiuser Riz Han Qazaqstan brendınıŋ dünie jüzınde älı onşa tanymal emestıgın aitty:
– Ädette men Qazaqstan jaily äŋgıme aita bastasam, menen adamdardyŋ sūraityn eŋ bırınşı sūraǧy – «Ol qauıpsız el me?». Öitkenı, Auǧanstan, Päkıstan siiaqty memleketterdıŋ äserınen olar «-stan» degen jūrnaǧy bar elderdıŋ barlyǧyn qauıptı dep sanaidy. Bıraq sızder osy jūrnaqty özderıŋızdıŋ paidalaryŋyzǧa jaratsaŋyzdar bolady. Mäselen, #Explorestan degen turistık brend qalyptastyryp, öz elderıŋızdı nasihattasaŋyzdar tamaşa emes pe?! – degen ol osy ataudyŋ türlı salalardaǧy subbrendın de oilastyrudy ūsyndy. Mysaly, qazaqtyŋ tabiǧatyn #naturestan, ondaǧy saiahatşylardyŋ mümkındıkterın #adventurestan, mädenietın #nomadistan sekıldı heştegtermen sipattau Qazaqstan turaly aqparattyŋ meilınşe keŋınen taraluyna yqpal etetının jetkızdı.
Al Qyrǧyzstannan kelgen qonaq, sol eldegı Aikur Federasiiasynyŋ prezidentı Maqsat Chakievtıŋ oiynşa, Qazaqstan üşın Jıbek Joly brendın ielenu eŋ sättı qadam bolar edı.
Forum aiasynda «Astana Convention Bureu» ūiymynyŋ direktory Saniiar Äitekenov, «The Steppe» media-jobasynyŋ negızın qalauşy Zäure Rozmat, «Community» halyqaralyq basylymynyŋ şef-redaktory Tatiana Liulka syndy spikerler de söz söilep, Qazaqstandaǧy turizmdı ılgerıletudıŋ joldary jönındegı pıkırlerımen bölıstı.
