Qazaqstan Respublikasy Aziia toby memleketterınıŋ atynan Bırıkken Ūlttar Ūiymynyŋ Qauıpsızdık Keŋesınıŋ 2017-2018 jyldarǧa uaqytşa müşesı bolyp sailandy. Būl turaly 2016 jylǧy 28 mausymda Niu-Iorkte BŪŪ Bas Assambleiasynda ötken dauys berudıŋ nätijesınde mälım boldy.
Būl turaly Syrtqy ıster ministrlıgınıŋ baspasöz qyzmetı habarlaidy.
Dauys beruge qatysqandardyŋ arasynan 138 memleket Qazaqstannyŋ kandidaturasy qoldady. Qazaqstandyq ötınımnıŋ jalǧyz bäsekelesı – Tailand Koroldıgı üşın 50-den astam memleket dauys berdı.
«Bükıl Qazaqstan üşın būl tarihi kün, öitkenı bızdıŋ elımız BŪŪ Jarǧysy boiynşa ǧalamdyq qauıpsızdık pen beibıtşılıktı saqtauǧa ökılettengen eŋ maŋyzdy saiasi organnyŋ qūramyna tarihta bırınşı bolyp sailanǧan Ortalyq Aziianyŋ memleketı boldy. Bügıngı nätije – halyqaralyq deŋgeidegı Qazaqstannyŋ jäne bızdıŋ Elbasymyz Nūrsūltan Nazarbaevtyŋ jeke tūlǧasynyŋ biık bedelınıŋ, onyŋ ǧalamdyq jäne öŋırlık mäselelerdı retteuge, iadrolyq qarusyzdanu men taratpau mäselelerın ılgerıletuge qosqan bıregei ülesınıŋ jarqyn kuälıgı», – dep mälımdedı osyǧan orai QR Syrtqy ıster ministrı Erlan Ydyrysov.
BŪŪ QK sailanu sondai-aq bızdıŋ memleketımızdıŋ beibıtsüigış däiektı syrtqy jäne ışkı saiasatynyŋ halyqaralyq qauymdastyqta joǧary qūrmetteletının däleldedı.
Anyqtama: BŪŪ Qauıpsızdık Keŋesı 15 memleketten qūralǧan, olardyŋ beseuınıŋ tūraqty müşelık märtebesı bar (Resei, AQŞ, Qytai, Ūlybritaniia jäne Fransiia), al qalǧan onynyŋ ärqaisysy ekı jyldyq merzımge 5 öŋırlık toptardyŋ atynan sailanady. Qazaqstan Aziialyq memleketter tobynyŋ ökılı retınde Malaiziiany almastyrady.
