DIý SOLEI SİRKI ASTANADA! ENDI ÜŞ AI BOIY ASTANALYQTAR MEN QALA QONAQTARY ATAQTY SİRK ÄRTISTERINIŊ ÖNERIN EKSKLIýZİVTI «REFLEKT» ŞOUYNDA TAMAŞALAIDY. KEŞE BASTALYP, 9 QYRKÜIEKKE DEIIN JALǦASATYN SİRK NENDEI QYZYQ DAIYNDADY? BIRGE BILEIIK.
Kök tüstı kostium kigen bır top ärtıs törtbūryş tärızdes şynyda kürdelı akrobattyq nömırdı daiyndady. Olardyŋ kiımı qazaqtyŋ oiu-örnegımen äşekeilendı. Būl kezdeisoqtyq emes. «Reflekt» şouy – qazaqy naqyşta, qazaq jūrty üşın arnaiy qoiylyp otyr.
Olardan keiın sahnaǧa döŋgelekte şyr köbelek ainalyp jürgen ärtıs şyqty. Aita keteiık, är qoiylymdaǧy muzykada qazaqtyŋ dästürlı äuenın, qoŋyr äuezın estisızder. Qazaqşa kiıngen sarbazdar atty tızgındep, sirk törıne şyqty. At degende, kädımgı at emes, aǧaştan jasalǧan öner tuyndysy. Sebebı, diu Solei sirkınde januar joq ekendıgın ūmytpaŋyzdar.
Ärtısterdıŋ şeberlıgı sondai, bır sekund ta jalyqtyrmaidy, körermen nazaryn ūstap otyrady. Tal şybyqtai maiysqan akrobattardyŋ biın tamaşalap otyrǧan sätte, kütpegen jerden basqa bır ärtıs jarq etıp şyǧa keledı. Sodan bolar, 75 minutqa sozylǧan qoiylym 7 minuttai öttı de kettı.
Eŋ kürdelı nömırlerdıŋ bırı – qyz ben jıgıttıŋ ülken şar şeŋberınde ainalyp öner körsetuı der em. Sahnadaǧy är keiıpker qozǧalysta bolyp, pantomima arqyly özderıne taŋdalǧan beinelerın jetkıze bıldı. Ärı būl oiyndy jandandyra tüstı.
Keş barysynda änşı qyz siqyrly dausyn sozyp, ǧajaiyp älemge jetelegendei boldy. Bır kezde jaryq öşıp, zal typ-tipyl boldy. Alaulatyp, jalaulatyp baiker zu-zu etıp ötıp şyqty. EKSPO körmesınıŋ taqyrybyna sai, motosiklderdıŋ barlyǧy elektrlı boldy. Taǧy bır akrobat qos döŋgelekpen arqan jıpte sekırıp, kürdelı triukter jasady. Eŋ qiyny osy şyǧar dep otyrǧan kezde, oǧan äuede qalqyp jürıp, töŋkerılgen velosipedtı aidaǧan ärtıs qosyldy. Jerge tüsken ol iegınıŋ ūşyna ūzyn taiaqty qoiyp, gitaranyŋ qūlaǧynda oinady.
Saiqymazaqsyz sirk eşqaida ötpeitın şyǧar. Diu Solei sirkınde de kışkentai kölıktı aidap bır kloun keldı. Būl jerde fransuzdardyŋ klassikalyq önerın tamaşaladyq. Auditoriiamen bailanys ornatyp, halyqtyŋ köŋılın tapty. Şynymen de, ezuıŋdı jimai otyrasyŋ.
Ūiymdastyruşylar äu bastan otty şou bolatynyn aityp qalǧan edı. Aitylǧan söz jerde qalmady. Otqa oranǧan samūryq qūsy ūşyp kelıp, basty keiıpkerge ot ūşqynyn ala keldı. Al ol bolsa, jerge jatyp alyp, otpen alysty. Ärtıster otty ärı laqtyryp, berı laqtyryp, qoiylymnan lazerlık şou jasady.
Sirk turaly qalyptasqan ūǧymdy tübegeilı özgertkıŋız kelse, mındettı türde diu Soleige kelıŋız.
Güldana TALǦATQYZY
