Elde ındet şaryqtau şegıne jetken mausym aiynda koronaviruspen kürestıŋ qaq ortasyna jıberılgen därıgerlerdıŋ bırı – qoǧamdyq densaulyq saqtau magistranty Balnūr Janarbek. Ol 5 jyldan berı elordada qalalyq №8 emhananynyŋ aldyn-alu jäne psihologiialyq, äleumettık kömek körsetu bölımınde eŋbek etıp keledı.
Osy jyly mausym aiynan 15 tamyzǧa deiın qaladaǧy №3 köpsalaly jūqpaly aurular auruhanasynda Balnūr Sliamhanqyzy virus jūqtyrǧan orta jäne auyr därejedegı pasientterdı qabyldap, emdeuge jūmyldyrylǧan.
– Bız PTR synaq nätijesınde auruy tolyq rastalǧan elordalyq jäne qala maŋyndaǧy Qoiandy, Qosşy eldı mekenderınen tūrǧyndardy qabyldadyq. Sonymen qatar virusty pnevmoniiamen qosa qosymşa sozylmaly aurulary bar nauqastardy da qaradyq. Mäselen, jürek-qan ainalym, endokrindık jüiesınde auruy bar nauqastarǧa medisinalyq kömek körsettık. Därıgerlık jūmys täjıribemızdegı eŋ qiyn kezeŋ bolǧan osy uaqytta täulıgıne 50-80 nauqastan qabyldadyq. Osy aralyqta ärıptesterımızben bırge myŋdaǧan nauqastardy emdep şyǧardyq. QR DSM jäne Nūr-Sūltan qalasy äkımdıgıniŋ qoldauymen dertpen küreste barlyq jaǧdai jasaldy. Būl bızge joǧary sapaly medisinalyq kömek körsetuge mümkındık berdı, – deidı därıger.
SOVID-19-ben küres jürgızgen ekı aida ol da barlyq ärıptesterı sekıldı Ramada Plaza qonaq üiınde otbasyn körmei jūmys ıstedı. Qazır qaitadan özınıŋ qyzmet ornyna oralyp, qalypty jūmysyn jalǧastyryp jatqan maman az bolsa da täjvirusty jūqtyryp keletınderdıŋ bar ekenın aitady. Olardyŋ dertı anyqtalǧan boida stasionarǧa emdeuge jıberıledı.
Mamannyŋ aituynşa, dertke şaldyqqandarda qorqynyş sezımı 2-3 esege artyp ketedı. Olardyŋ köbınde boiyn qorqynyş bilep, ömırden küder üzuge daiyn bolatyndar jiı kezdesken.
– Är türlı nauqastar boldy. Qalai da dertımdı jeŋem deitınder de, tūla boiyn ürei bilegender de kezdestı. Senımdı adamdardy emdeu de oŋai. Olar arnaiy därıgerlık emdeudıŋ kömegımen tez-aq jazylyp şyǧyp jatty. Al küizelıske tüskenderge qosymşa moraldyq-psihologiialyq kömek körsetuge tura keldı. Jalpy, būl virus tek ökpege ǧana emes, adamnyŋ jüike jüiesıne de terıs äser etedı. Onyŋ üstıne tört qabyrǧada qamalyp, oqşaulanu, künde internetten kıleŋ «negativ» aqparattardy oqu da nauqastyŋ eŋsesın tüsıredı. Bıraq därıgerdıŋ eŋ bırınşı emı – aldyna kelgen nauqasqa jyly sözın arnap, onyŋ jazylyp ketetıne senımın arttyru bolǧandyqtan bız būǧan daiyn bolyp keldık. Därıger bolǧan soŋ söilei alu, jabyqqan jannyŋ köŋılın aulau da maŋyzdy maşyq. Bız barlyq qabyldaǧan pasientterdıŋ janynan tabyluǧa tyrystyq. Sonymen qatar qosymşa qorqynyş sezımın tömendetın nevrologiialyq preparattar da berdık, – deidı Balnūr Janarbek.
2008-2015 jyldar aralyǧynda Semei memlekettık medisina universitetınde «Jalpy medisina» fakultetınde bılım alǧan Balnūr oquyn qyzyl diplommen tämamdaǧan soŋ, bırden elordaǧa bet būrdy. Eŋbek jolyn el astanasynan bastaudy jön kördı. Bügıngı jaǧdaiǧa bailanysty därıgerdıŋ berer keŋesı – azamattardyŋ aldyn-alu şaralaryn saqtau, dūrys tamaqtanu, bettūmşany kündelıktı qoǧamdyq oryndar men jūmys barysynda taǧu.
