Elordadaǧy köşelerge tüsetın şamadan tys jüktemenı azaitu üşın jolairyqtar, köpırler men ötkelder salynyp jatyr. Biyl 150 köşe jöndelıp, keibıreuı jaŋadan salynady. Osy jyly josparlanǧan jol jūmystarynyŋ 70 paiyzy tūrǧyn alaptarda jürgızıledı. Bügınde joldar qūrylysy äkımdıktıŋ jıtı baqylauynda tūr.
– Nova City tūrǧyn üi keşenınıŋ aumaǧy, №39 köşesınen bastap №27 köşenıŋ bır bölıgınde jol salamyz. Būl köşe äuejai men «Telman» tūrǧyn alabyna aparatyn joldy jalǧauǧa mümkındık beredı. Sonyŋ esebınen tūrǧyn alap tūrǧyndarynyŋ qalaǧa jol jüru uaqyty edäuır qysqarady. Sonymen qatar, Mäŋgılık el jäne Ūly Dala daŋǧyldaryndaǧy jüktemenı azaituǧa mümkındık beredı. Osy jaŋa köşeden Esıl özenı men «Nūra-Esıl» arnasy arqyly ötetın ekı köpır bolady. Qazır qūrylys jūmystary jürıp jatyr. Köpırler oŋ jäne sol jaǧalaudy jalǧap, qalanyŋ ekı bölıgın ainalma etuge mümkındık beredı, – dedı qala äkımı Altai Kölgınov.
Qala basşysy tūrǧyndarmen kezdesu, azamattardy qabyldau jäne esep beru kezdesulerınde elorda halqy joldardy asfalttau mäselesın kötergenın atap öttı.
– Bız barlyq ūsynystardy jinap, keste qūrdyq. Qysta barlyq daiyndyq jūmystaryn jürgızdık. Biyl jöndelıp jatqan joldar bırneşe talap boiynşa taŋdaldy. Eŋ aldymen būryn asfalt bolmaǧan joldardy taŋdadyq. Mūndai joldardyŋ köbı tūrǧyn alaptarda ornalasqan. Sonymen qatar, jaŋa avtobus baǧyttary ıske qosylatyn köşeler men qozǧalys qarqyny joǧary köşeler qamtyldy.
Sapasyz joldardy qabyldamaimyz. Jol sapasyz bolǧan jaǧdaida merdıgerler öz esebınen joldy qaita jasaityn bolady, – dep atap öttı qala basşysy.
