Būrnaǧy künı Astana qalasynyŋ ırgesındegı «Äljan ana» meşıtınde qasiettı Qūrban ait merekesıne orai baspasöz mäslihaty öttı. Qazaqstan mūsylmandary dıni basqarmasy ūiymdastyrǧan şaraǧa «Nūr Astana» ortalyq meşıtı bas imamynyŋ orynbasary Nūrlan Ramazan, «Äljan ana» meşıtınıŋ bas imamy Quanyş Säbitov jäne Astana qalasy Dın ısterı jönındegı basqarmasynyŋ bölım basşysy Arman Pırzadaev qatysty.\
Brifing barysynda Nūrlan Ramazan 12 qyrküiekte saǧat 7.30-da ait namazyn oqumen bastau alatyn qasiettı Qūrban ait merekesınıŋ män-maŋyzy turaly äŋgımeledı. Sonymen qatar, ūlttyq naqyşta sipat alatyn merekede qala meşıtterınde ülken daiyndyq jasalyp, bırqatar igı şaralar men aksiialar qolǧa alynatynyn aitty. «Qūrban ait – qazaq halqy üşın airyqşa mereke. Töl dästürımızge ainalǧan mübärak meiramdy būqara bolyp atap ötu – bızdıŋ igı saltymyz. 11 qyrküiek künı – Arapa, 12-14 qyrküiek aralyǧynda üş kün Qūrban ait atalyp ötıledı. Qūrban aittyŋ qūrmetıne respublika boiynşa, sonyŋ ışınde bas qalamyzda auqymdy şaralar ūiymdastyru josparda bar» degen N. Ramazan qaladaǧy «Nūr Astana», «Äzıret Sūltan» jäne «Ǧylmani» meşıtterı aulasynda kiız üiler tıgılıp, ūlttyq sporttyq oiyndar, mädeni ıs-şaralar ötkızıletının jetkızdı.
Būl künderı qala köşelerınde qasiettı aidy süiınşılep arnaiy qūttyqtau bilbord-bannerlerı ılınse, meşıt aulalarynda qaiyrymdylyq järmeŋkelerı halyqty ızgılıkke şaqyrady. Ait namazyn ärı merekenı meşıtte ötkızuge jiylǧan jūrtşylyqqa qūrbandyq şalu räsımıne qatysty arnaiy tüsındırme paraqşalary 10 myŋ danamen tegın taratylady. Mübärak meiramnan büldırşınder de şet qalmaidy, «Quansa, bala quansyn» şarasynda balalarǧa bazarlyq ülestırılmek.
Merekenıŋ basty maqsaty qūrban şalyp, ızgılık jasau bolǧandyqtan, mümkındıgı jetken adam Alla jolynda mal soiyp, mūsylmandyq mındetın öteidı. Osyǧan orai, biyl da qala äkımdıgı sanitarlyq-epidemiologiialyq normalar men talaptardy saqtau maqsatynda qūrbandyqqa şalynatyn maldardy satu, soiu jäne taratuǧa rūqsat etılgen arnaiy oryndardy bekıtıp berdı. Olar – Astana-Qosşy tas jolyndaǧy «Altyn Taǧa» mal bazary, Alaş tas joly № 30 mekenjaiyndaǧy «Nūrbereke 555» JŞS, Tılendiev daŋǧyly № 36 mekenjaiyndaǧy «Saianūr» bazary, Astana-Sofievka tas jolyndaǧy «Temeş» ŞQ, Astana-Qaraǧandy tas jolyndaǧy «Metro» sauda üiı, Alaş tas joly № 33 mekenjaiyndaǧy «Jailau» nysany, Jeleznodorojnyi kentındegı «Maqsat 2007» ŞQ jäne Astana-Pavlodar tas jolyndaǧy «Şauşen» JŞS.
Dın ısterı jönındegı basqarmanyŋ bölım basşysy Arman Pırzadaev atalǧan nysandar Qūrban aittyŋ qūrmetıne el igılıgı üşın berılgendıkten, mal soiu barysynda sanitarlyq talaptardy saqtauǧa şaqyrdy. Aita ketsek, osy maqsatta juyrda ǧana «Nūr Astana» ortalyq meşıtınde qasapşylarǧa arnaiy seminar-trening ötkızılıp, qūrbandyq malyn şaludyŋ şariǧi, medisinalyq talap-şarttary jan-jaqty tüsındırılgen.
Al aituly mereke künderı Astana meşıtterınde «Rabbyŋ üşın qūrban şal!» qaiyrymdylyq şarasy auqymdy türde ötkızılmek. Şara aiasynda dın qyzmetkerlerı qala äkımdıgımen bırlesıp, jinalǧan qūrbandyq etterın tūrmys-ahualy tömen, mūqtaj otbasylarǧa taratudy josparlaidy.
Ashat RAIQŪL
