Arqanyŋ ardaqty azamattarynyŋ bırı, «Astanaqūrylysservis» JŞS ǧylymi-tehnikalyq qūrylys sapasyn qamtamasyz etu bölımınıŋ injenerı Maidan Kömekūly Qūsaiynovtyŋ esımı bügınde osy öŋırdegı jaqsylar men jaisaŋdardyŋ qatarynda atalyp jür. Öitkenı, ol – Qazaqstannyŋ qūrmettı qūrylysşysy, L.N.Gumilev atyndaǧy Euraziia ūlttyq universitetınıŋ professory, qūrylys jönındegı köptegen kıtaptardyŋ avtory ǧana emes, sonymen bırge «Memorialdy aimaq» ızdestıru otriadynyŋ komandirı, eŋ bastysy, «Astana taŋdauy-2012» konkursynyŋ jeŋımpazy.
Jasy jetpıstı alqymdasa da, ol tym tyŋ. Tılımız–tasqa. Jastardan bır elı qalysar emes. Qūrmettı demalysqa şyǧuǧa da asyqpaidy. Sebebı, Elbasy aitqandai, el igılıgı jolynda atqaratyn auqymdy ısterı älı de jeterlık.
Erke Esıldıŋ jaǧasynda jaŋaşa säulettık naqyşpen boi tüzep jatqan äsem qalanyŋ sūlu beinesı alystan köz tartyp, köŋıl bauraidy. Sondyqtan, onyŋ erteŋıne barlyq qazaqstandyqtar ülken ümıtpen qarap, bükıl älem qyzyǧa köz tıgude. Al, osyndaǧy barlyq maŋyzdy nysandar: memlekettık, ükımettık ǧimarattar, sport jäne tūrǧyn üi keşenderı, köptegen sauda ortalyqtary osy Maidan aǧamyzdyŋ «qolynan», iaǧni sapa saraptamasynan öttı.
Qaraǧandydaǧy politehnikalyq institutty tämamdaǧan jas maman alǧaşqy eŋbek jolyn Pavlodar qalasynyŋ industrialdyq institutynda «Qūrylys tärtıbı» pänınen därıs oqudan bastaidy. Üş jyldan soŋ selinogradtyq studentterge sabaq bere bastaǧan Maidan Kömekūly 1981 jyly Leningradtaǧy injenerlık-qūrylys institutynyŋ aspiranturasyn bıtırıp, tehnika ǧylymynyŋ kandidaty ǧylymi ataǧyn alyp, tuǧan qalasyna oralady.
– Elorda jaŋa salyna bastaǧan tūsta bız jaŋartylǧan älemdık tehnologiialarmen tanysa bastadyq. Men sol kezde ony igeruge qatystym. Sol tūstyŋ özınde-aq studentterımdı nemıstıŋ jäne fransuzdyŋ qūrylǧylarymen tanystyryp, apta saiyn olardy qūrylys alaŋdaryna alyp şyǧyp, barlyq prosestı közderımen köruge mümkındıkter tuǧyzdym. Jas elordamyzdy mıne, bügınde däl solar salyp jatyr, – deidı «Astanaqūrylysservis» JŞS-nıŋ injenerı Maidan Qūsaiynov.
2002 jyly ol Resei Federasiiasynyŋ elşılıgın saluǧa kırısedı. Däl sol kezde, elşılık ǧimaratynyŋ qūrylysyn bastamas būryn ol qala säuletı boiynşa qanşama ädebiettermen tanysyp, elordanyŋ qūrylysynda özınşe ız qaldyruǧa kırısıp ketedı. Sonyŋ arqasynda bügınde Astananyŋ kelbetınde ūlttyq naqyş baiqalady.
– Äl-Farabi babamyzdyŋ eŋbekterınde onyŋ qūrylys salasyna qatysty eksperimentterı turaly da aitylǧan. Degenmen, köpşılık ol kısınıŋ qūrylysşy da bolǧanynan beihabar. Negızı ol älemdegı eŋ berık, klimattyq jaǧdailarǧa tözımdı ǧajaiyp qaqpalar men kümbezderdı salǧan eken. Köptegen tūrǧyn üi keşenderıne olar erekşe sän berıp tūr. Mäselen, Prezidenttıŋ eskı rezidensiiasynyŋ qūrylysynda europalyq stil basym bolsa, Aqordada Äl-Farabi kümbezı jarqyrap tūr. Demek, qala bastapqyda Kurokava josparlaǧandai europalyq erekşelıktermen emes, qazırgı künde ūlttyq naqyştary bar özındık qaitalanbas kelbetımen aişyqtalyp, ajarlanyp keledı, – deidı M.Qūsaiynov.
Maidan Kömekūly jaŋa qūrylys alaŋdarynda barlyq jūmystyŋ sapaly atqaryluyna jauap beredı. Sondyqtan da, būl jerlerdegı kışkentai ǧana kemşılıktıŋ qanşama qiyndyqtarǧa äkelıp soǧuy mümkın ekenın ol jaqsy bıledı. Özı qūrylys salasyndaǧy sapany baqylau boiynşa komissiianyŋ müşesı.
Öz mamandyǧyn jete meŋgergen, özıne de, özgege de talap qoia bıletın ısker jandy basşylar da baǧalai bıledı. «Mäkeŋnıŋ täjıribesı – kompaniiamyz üşın baǧa jetpes bailyq. Ol bılgenderın keiıngılerge üiretıp keledı jäne mūnyŋ bärın şyn köŋılımen ısteidı. Qai jaǧynan alyp qarasaq ta, ol asa prinsipşıl adam. «Astana taŋdauy» konkursy barysynda bız ūjym bolyp sol kısıge dauys berdık. Öitkenı, bız Maidan Kömekūlynyŋ elordamyzdaǧy eŋ taŋdauly azamattardyŋ bırı ekenıne eş kümän keltırgen emespız», – deidı «Astanaqūrylysservis» JŞS-nıŋ direktory Jūmaǧali Qūsaiynov.
Özınıŋ ömır soqpaǧynda syilastyq pen dostyqtyŋ ūlaǧatyn ūlyqtap, ülkenge qūrmet, kışıge ızet bolarlyq qasietımen daralanyp jürgen aǧamyzdy astanalyqtar da şyn mänınde maqtan tūtady. «Astana taŋdauy-2012» konkursynyŋ jeŋımpazy atanuy da sondyqtan bolsa kerek.
Gülbarşyn ÖKEŞQYZY
