Elorda äkımı Jeŋıs Qasymbek qūrylysy ūzaqqa sozylǧan bırqatar ǧimaratqa baryp, 30-dan astam tūrǧyn üi keşenın biyl aiaqtaudy tapsyrdy.
«Tūrǧyndarmen, onyŋ ışınde üleskerlermen tūraqty türde kezdesıp tūramyn. Qūrylysy ūzaqqa sozylǧan bırqatar ǧimaratqa bardym. Özderıŋızge mälım, är nysannyŋ ötken tarihy ärtürlı, olardyŋ qūrylysy bırneşe jyldan berı bıtpei keledı. Mäselen «Aqerke-2» tūrǧyn üi keşenınıŋ tıptı ırgetasy da bolmaǧan edı, al «Pana» tūrǧyn üi keşenınıŋ qūrylysy 8 jyl būryn bastalǧan» dedı qala äkımı J.Qasymbek.
Osyǧan deiın äkımdık qūrylysy ūzaqqa sozylǧan nysandardy aiaqtau boiynşa jüielı jūmys jürgızgenı belgılı. Degenmen qalǧan nysandardy aiaqtau mındetı tūr. Būl – 30-dan astam tūrǧyn üi keşenı, onda myŋdaǧan otbasy jyldar boiy baspanasyn kütıp jür. Qūrylysy ūzaqqa sozylǧan ärbır nysandy aiaqtau boiynşa arnaiy jospar bar. Sondyqtan äkım biyl osy nysandardy aiaqtaudy tapsyrdy.
Qalany aralau barysynda J.Qasymbek donor-nysandardyŋ qūrylysymen tanysty. Olar ūzaqqa sozylǧan nysandardyŋ qūrylysyn aiaqtau üşın salynǧan qarajattyŋ qaitarymyn qamtamasyz etedı.
«Jalpy qūrylysy ūzaqqa sozylǧan nysandardyŋ aiaqtaluy Memleket basşysynyŋ baqylauynda. Üleskerlerdıŋ problemalaryn şeşu – būl bızdıŋ mındetımız» dedı elorda äkımı.
