Memleket basşysy Qasym-Jomart Toqaev Ūlttyq ǧylym akademiiasynyŋ 75 jyldyǧyna arnalǧan sessiiada söilegen sözınde referendumnyŋ maŋyzyna toqtalyp, Ata Zaŋymyzǧa engızıletın özgerısterdı tüsındırıp berdı.
Memleket basşysy atalǧan jiynda bırneşe künnen keiın Konstitusiiaǧa engızıletın tüzetuler boiynşa referendum ötetınıne toqtalyp, būl bolaşaǧymyzdy aiqyndaityn jauapty sät ekenıne nazar audardy.
«Būl qoǧamdyq-saiasi özgerısterge qoǧamnyŋ sūranysyn jäne halyqtyŋ aldaǧy özgerısterdıŋ şynaiylyǧyna degen senımın körsetedı. Öitkenı osy reformalar jeke tūlǧalardyŋ, sonyŋ ışınde Prezidenttıŋ artyqşylyqtaryn arttyrudy emes, bükıl qoǧamnyŋ müddesın közdeidı. Menen el ışınde de, şetelde de Memleket basşysy öz ökılettıgın referendum arqyly ūzartuǧa, basqaşa aitqanda, prezidenttık ökılettıktı qaita bastauǧa qamdanyp jatyr ma dep sūraidy. Menıŋ jauabym bıreu-aq, mūndai niet bolǧan emes, bolmaidy da» dedı Qasym-Jomart Toqaev.
Ūsynylyp otyrǧan saiasi jaŋǧyrtu baǧdarlamasynyŋ mazmūny auqymdy. Bıraq basty nazar adam qūqyǧy men bostandyǧyn qorǧau jüiesın nyǧaituǧa, azamattardyŋ memlekettık basqaruǧa qatysuyn keŋeituge, memlekettık instituttardyŋ aşyqtyǧy men tiımdılıgın arttyruǧa baǧyttalǧan.
«Damyǧan demokratiialyq qoǧam qūru degenımız aiqailap ūrandatu, bırden nätijege qol jetkızu emes, däiektı jäne jüielı jūmys jürgızu ekenın tüsınuımız kerek. Elımızde joǧary saiasi jauapkerşılık mädenietı ornyǧuy qajet. Bükılhalyqtyq referendum jaŋa ädılettı Qazaqstandy qūrudyŋ maŋyzdy bastamasy bolmaq» dedı Memleket basşysy.
Prezident qolǧa alǧan reformalardyŋ tabysty boluy olardy jüzege asyruǧa barlyq azamattyŋ qalai atsalysatynyna tıkelei bailanysty ekenıne nazar audardy. Bärımız bır jaǧadan bas, bır jeŋnen qol şyǧarǧanda ǧana eldıŋ naqty jaŋǧyruyn jäne progressivtı damuyn qamtamasyz ete alamyz.
«Aldaǧy referendum eldıŋ saiasi transformasiiasynyŋ soŋǧy kezeŋı emes, şyn mänınde, onyŋ bastamasy ekenın atap ötkım keledı. Jūmys endı ǧana bastalyp jatyr, öitkenı ömırdıŋ özı jäne azamattardyŋ qajettılıkterı bızge jaŋa mındetter jükteidı. Saiasatta şalt qimylǧa jol berılmeitının, eŋ kürdelı geosaiasi jaǧdailarda ol joiqyn zardaptarǧa, degradasiiaǧa, tıptı memlekettılıktıŋ joǧaluyna äkep soqtyruy mümkın ekenın qaperde ūstau kerek. Bız osyndai tar jol, taiǧaq keşude är qadamymyzǧa baiyppen qarauymyz kerek» dedı Qasym-Jomart Toqaev.
