Memleket basşysy Qasym-Jomart Toqaev Ūlttyq qoǧamdyq senım keŋesınıŋ VI otyrysyna qatysty. Keŋestıŋ öŋırlerdegı müşelerınıŋ qatysuymen onlain formatta ötken jiyn barysynda Prezidenttıŋ Ūlttyq keŋes aiasynda būǧan deiın bergen tapsyrmalarynyŋ oryndalu barysy, sondai-aq qoǧamdyq, äleumettık-ekonomikalyq jäne aimaqtyq damu mäselelerı jönındegı ūsynystar talqylandy.
Memleket basşysy Täuelsızdıktıŋ 30 jyldyǧy bükıl halqymyz üşın airyqşa mänı bar mereilı beles, memleketımızdıŋ damu jolyndaǧy maŋyzdy meje ekenın atap öttı. Sonymen qatar qoǧamdyq maŋyzy bar naqty jūmystar atqarylyp jatqanyn jäne būǧan airyqşa män beretının jetkızdı. «Bız osy tarihi beleske myqty memleket jäne bırtūtas ūlt retınde jetıp otyrmyz. Saiasi jaŋǧyru, ekonomika qūrylymyn özgertu, äleumettık salany damytu jūmystary tyŋ qarqynmen jalǧasuda. Būǧan Ūlttyq qoǧamdyq senım keŋesı zor üles qosuda. Ūlttyq keŋestıŋ bastamalaryn jüzege asyru üşın 90-nan astam normativtık-qūqyqtyq akt qabyldandy» dedı Qasym-Jomart Toqaev.
Qazaqstan Prezidentınıŋ aituynşa, kez kelgen özgerıs halqymyzdyŋ tūrmysyn jaqsartu üşın jasaluy kerek. Memlekettılıgımızdı nyǧaityp, äleuetımızdı arttyrudy közdeitın ūsynystardy ǧana jüzege asyrǧan jön. Būl – Memleket basşysynyŋ aiqyn ūstanymy. «Keŋes ekı jyldyŋ ışınde elımızdegı köptegen oŋ özgerıske jol aşty. Bolaşaq ūstazdar men därıgerlerdıŋ, doktoranttardyŋ stipendiiasy köbeidı. Joǧary oqu oryndarynda sabaq beretın oqytuşylardyŋ jalaqysy östı. Sanitarlyq-epidemiologiialyq baqylau komitetı qūryldy. Erekşe kütımdı qajet etetın balalarǧa bılım berudıŋ jaŋa erejelerı bekıtıldı. Oŋtüstıkten soltüstıkke qonys audarǧan azamattarǧa berıletın subsidiia ekı ese ūlǧaidy. İgerılmei jatqan jer telımıne salynatyn bazalyq salyq stavkasy artty. Auyl şaruaşylyǧy jerlerın şeteldık azamattar men zaŋdy tūlǧalarǧa satuǧa jäne jalǧa beruge tyiym salyndy» dedı Prezident.
Memleket basşysy osy jyldan bastap jūrtqa zeinetaqy jinaǧynyŋ bır bölıgın merzımınen būryn aluǧa mümkındık berılgenın, ony jyljymaityn mülık satyp aluǧa, ipotekalyq nesienı öteuge jäne emdeluge jūmsap jatqanyn eske saldy. Sonyŋ arqasynda jarty millionnan astam azamatymyz zeinetaqy jinaǧyn qajetıne jaratqan. Al äleumettık jaǧynan älsız toptardy qoldaityn bırqatar şeşım qabyldanǧan. «Biyl alǧaş ret köpbalaly, mügedek balasy bar jäne tolyq emes otbasylardyŋ balalaryna bılım granty berıldı. Sonyŋ nätijesınde osyndai otbasynda ösken 5 myŋnan astam jetkınşek tegın oquǧa mümkındık aldy. Erekşe kütımdı qajet etetın balalarǧa bılım beru üşın bölınetın qarjy ekı ese ūlǧaidy. Qazır bır balaǧa 730 myŋ teŋgeden astam qarajat bölınedı» dedı Qasym-Jomart Toqaev.
Prezident keŋes müşelerınıŋ tıkelei atsalysuymen elımızdı odan ärı demokratiialandyruǧa baǧyttalǧan reformalardyŋ tört toptamasy jasaqtalǧanyn aitty. «Qazır äielder men jastarǧa özderınıŋ äleuetın ıske asyruǧa qosymşa mümkındıkter bar. Bıraq bız mūnymen toqtamaimyz. İnkliuzivtı qoǧam qūru barysynda erekşe kütımdı qajet etetın adamdardy qamtu üşın men partiialardyŋ sailau tızımderındegı kvota sanattarynyŋ sanyn köbeitudı ūsyndym» dedı Memleket basşysy. Qasym-Jomart Toqaev audandyq maŋyzy bar qalalardyŋ, auyl, kent jäne auyldyq okrug äkımderın tıkelei sailaudyŋ engızıluı qoǧamymyzdy demokratiialandyru jolyndaǧy ülken qadam bolǧanyn aitty. Biyl elımızde 800-den astam auyl äkımı sailanyp, nätijesınde auyl äkımderınıŋ korpusy ekı ese jaŋardy.
Qasym-Jomart Toqaev bılım beru salasynyŋ özektı mäselelerın şeşu jolyn ūsyndy. Atap aitqanda, mektepterde, kolledjder men joǧary oqu oryndarynda qauıpsızdıktı saqtau özektı ekenı aityldy. «Qazır oqu oryndary küzet agenttıgımen bır jylǧa kelısımşartqa otyrady. Ädette, ony jyldyŋ basynda jasaidy. Būl – oqu jylynyŋ ortasy degen söz. Mūndai kelısımşarttardy ūzaǧyraq uaqytqa, mysaly üş jylǧa jasaǧan tiımdı bolar edı. Oǧan rūqsat beru üşın zaŋnamaǧa özgerıs engızu qajet» dedı Memleket basşysy. Bılım beru salasyn jetıldıruge erekşe toqtalǧan Qasym-Jomart Toqaev mektepterdegı oryn tapşylyǧyn öte özektı mäsele retınde atady. Biylǧy Joldauynda 2025 jyldyŋ soŋyna deiın 1000 mektep salu turaly tapsyrma bergenın eske saldy. «Tūrǧyn üi alaptary boi kötergen kezde onymen bırge mındettı türde mektep pen balabaqşa salynuy kerek. Ükımetke zaŋnyŋ saqtaluyn qataŋ baqylaudy tapsyramyn» dedı Qazaqstan Prezidentı.
Qasym-Jomart Toqaev bügınde elımızde medisina kadrlarynyŋ tapşy ekenın aitty. Būl salaǧa 4 myŋǧa juyq qyzmetker jetıspeidı eken. Oblys ortalyqtarynda, äsırese, audandar men auyldarda bılıktı därıgerler az. Sondyqtan Prezident öŋır äkımderı osy mäselemen belsendı türde ainalysuǧa tiıs ekenıne nazar audardy. Memleket basşysy sifrlyq tehnologiiany barynşa engızudı taǧy bır bastama retınde atady. Prezident qazır aqparattyq bazalardyŋ arasynda bailanys joq ekenın, sonyŋ saldarynan qaǧaz jüzınde qūjat talap etu ürdısı älı de saqtalyp otyrǧanyn jetkızdı.
Sondai-aq Prezident memleket saiasatynyŋ basym baǧyttarynyŋ bırı ana men balany qoldau ekenın jetkızdı. Äiel adamdar bala kütımımen ūzaq uaqyt otyrǧanda käsıbi qabıletın tömendetıp alatyny, tıptı jalǧyzbasty ata-analarǧa mūndaida tıptı qiynǧa soǧatynyn aityp, olarǧa erekşe eŋbek jaǧdaiy jasaluy kerek ekenın atap öttı. Memleket basşysy sözınıŋ soŋynda taǧy bır mäselege arnaiy toqtaldy. Ūlttyŋ jaŋa bolmysyn qalyptastyru turaly ünemı aityp jürgenın, onyŋ öte maŋyzdy mındet ekenın eske saldy. «Reformalarymyzdyŋ tüpkı mejesı – ūlttyŋ sapasyn jaqsartu. Sebebı halqy myqty el ǧana quatty memleket qūra alady. Al ūltymyzdyŋ kemeldenuı üşın ärbır azamat öresı biık, parasatty boluǧa ūmtyluy qajet. Iаǧni sana özgermese, bärı beker. Şyn mänınde, jaŋǧyru tärbieden bastau alady. Sondyqtan bız ūrpaq tärbiesıne basa män beruımız kerek. Jastardyŋ boiyna eŋ ızgı qasietterdı sıŋıre bılgen abzal» dedı Prezident
