Keşe Astana qalasy qoǧamdyq keŋesınıŋ otyrysynda bas qaladaǧy 2018-2027 jylǧa deiıngı renovasiia baǧdarlamasy talqylandy. Būl jobanyŋ negızgı maqsaty – Astananyŋ eskı bölıgındegı qūrylystardy keşendı türde rekonstruksiialau arqyly zamanaui säulettık kelbetın qalyptastyru.
Būǧan deiın jürgızılgen renovasiianyŋ bırınşı kezeŋınde 2280 gektar aumaqtaǧy nysandar būzylyp, ol jerge jaŋadan 5,2 mln şarşy metr tūrǧyn üi salyndy. 20 jylda Kenesary köşesındegı, Slobodka audanyndaǧy jäne Komsomol kentındegı saiajailar men tūrǧyn üiler būzyldy. Ol jerlerde tūrǧyn üilerden bölek, jaŋa köşeler salyndy, jelıler tartyldy. Sonyŋ ışınde bırınşı kezeŋnıŋ şeŋberınde 2013 jyldan berı apattyq üilerdı būzu baǧdarlamasy da jüzege asyryldy. Būl baǧdarlama nätijesınde qalanyŋ eskı bölıgındegı 228 apatty üiler būzylyp, 3,5 myŋnan asa tūrǧyndar jaŋa, jaily üilerge qonys audardy.
2018-2027 jyldarǧa josparlanǧan renovasiianyŋ ekınşı kezeŋınde 1350 gektar jerdegı eskı ǧimarattardy būzudy qarastyrady. Būl jūmys üş kezekke bölıngen. Bırınşı kezekte 570 gektar (2018-2020 jyldar), ekınşı kezekte 680 gektar (2021-2025 jyldar) jäne üşınşı kezekte 100 gektar (2025-2027 jyldar) jerdegı nysandardy būzu qarastyrylǧan. Bosatylǧan aumaqtarda mynadai äleumettık maŋyzy zor nysandar boi köteredı: 14 mektep, 34 balabaqşa jäne 3 medisinalyq mekeme. Renovasiia prosesın kezeŋ-kezeŋmen jüzege asyru üşın qalanyŋ aumaǧy 14 uchaskege bölıngen. Aitarlyǧy, jobada Asan qaiǧy köşesımen şektesetın aumaqta jürgızıletın renovasiianyŋ bırınşı kezeŋı büge-şıgesıne deiın josparlanǧan. Atap aitsaq, būzylatyn nysandardyŋ tızımı naqtylanyp, eskı ǧimarattardy būzuǧa jäne jer uchaskelerın satyp aluǧa jūmsalatyn qarajat dälme-däl eseptelgen. Sonymen qatar, kölıktık-injenerlık infraqūrylym salu boiynşa ūsynystar daiyndalypty. 2022 jylǧa deiın 600-den asa apatty üilerdıŋ tūrǧyndaryn basqa jerge köşırıp, 420 myŋ şarşy metr baspana salu josparlanǧan. Basqosuǧa töraǧalyq etken Astana qalalyq qoǧamdyŋ keŋesınıŋ jetekşısı Sansyzbai Esılov Asan qaiǧy köşesınıŋ boiynda ornalasqan beiıtterge qatysty tüitkıldı mäselenı köterdı.
