«Astana» konsert zalynda «Täuelsızdıktıŋ 30 jyldyǧy: Saryarqa – tarihtyŋ bastauy» atty saltanatty ıs-şara öttı. Merekelık şarany Saryarqa audanynyŋ äkımı Eset Baiken aşty. Ol audannyŋ damuy turaly aityp, elordalyqtardy merekemen qūttyqtady.
«Täuelsızdık – halqymyzdyŋ basty qūndylyǧy. Egemendıktıŋ 30 jyly ışınde elımız barlyq qiyndyqtardy eŋserıp, halyqaralyq arenaǧa şyqty. Täuelsızdıgımızdıŋ jarqyn jetıstıkterınıŋ bırı – elorda. Saryarqa audany elordanyŋ qalyptasuyna kuä boldy. Ärqaisysyŋyz elımızdıŋ igılıgı üşın eŋbek etıp kelesızder. Barşa qazaqstandyqty Täuelsızdık künımen qūttyqtaimyn!» dedı Eset Baiken qūttyqtau sözınde. Nūr-Sūltan qalasy mäslihatynyŋ hatşysy Erlan Kanalimov öz jūmysyn sol kezde halyq eŋ köp qonystanǧan Saryarqa audanynda bastaǧanyn atap öttı.
«30 jyl ışınde elımızde ülken özgerıster boldy. Elbasynyŋ ūstanǧan saiasatynyŋ arqasynda ainalamyzdaǧy körşılermen kelıssözder jürgızılıp, memlekettık şekaramyz şegendeldı, äleumettık-ekonomikalyq, demografiialyq, ekologiialyq reformalar jasaldy. Elbasynyŋ eŋ ūly şeşımderınıŋ bırı – astanany Aqmolaǧa köşıru. Ol kezde şaǧyn provinsiialyq qalada nebärı 150 myŋ tūrǧyn bolatyn. Men öz qyzmetımdı 2002 jyly Saryarqa audanynda bastadym. Ol kezde ekı audannyŋ ışınde Saryarqanyŋ tūrǧyny köp boldy. Qazır qalamyzda 4 audan bar. Qala ösıp keledı, üiler salynyp jatyr, al mūnyŋ bärı atqarylǧan eŋbektıŋ arqasynda. Men astanamyzdyŋ jäne bükıl eldıŋ igılıgı üşın eŋbek etken jandarǧa alǧysymdy bıldırgım keledı. Elordamyz bükıl respublika damuynyŋ lokomotivıne ainaldy» dedı Erlan Kanalimov.
Sonymen qatar Nūr-Sūltan qalasy Qoǧamdyq keŋesınıŋ töraǧasy Sansyzbai Esılov elordalyq ardagerlerge qalanyŋ qalyptasuy men damuyna qosqan ülesı üşın alǧysyn bıldırdı.
Saltanatty jiyn barysynda audan tūrǧyndaryn marapattau räsımı öttı. QR Prezidentınıŋ Jarlyǧymen «Qazaqstan Täuelsızdıgıne 30 jyl» tösbelgısın 12 adam, «Halyq alǧysy» medalın 8 adam aldy. Qala äkımı men audan äkımınıŋ alǧys hattary qalamyzdyŋ 40 tūrǧynyna tapsyryldy, olardyŋ arasynda qoǧam qairatkerlerı, belsendı qala tūrǧyndary, ardagerler, äleumettık maŋyzy bar mamandyq ielerı bar. Sol siiaqty «Altyn alqa» jäne «Kümıs alqa» tösbelgılerımen marapattalǧan audannyŋ köpbalaly analary da qūrmetke bölendı.
Saltanatty şara qazaqstandyq estrada jūldyzdary men Nūr-Sūltan qalasy äkımdıgınıŋ memlekettık akademiialyq filarmoniiasynyŋ merekelık konsertımen jalǧasty.
https://www.youtube.com/watch?v=ZddcRWxHFn4
