Köktemnıŋ alǧaşqy künınde astanalyq belsendı qariialar Q.Mūŋaitpasov atyndaǧy ortalyq stadionǧa jinalyp, şaŋǧy tebuden özara jüirıkterın anyqtady. Alǧys aitu künıne tura kelgen būl şarany ūiymdastyruǧa qalalyq ardagerler keŋesı ūiytqy boldy.
Būl jarysqa qatysuǧa 50-den asa qart niet bıldırdı. Olardyŋ ışınde qimyly şiraq apalarymyz da bar. Sondyqtan jinalǧan qauym erler jäne äielder bolyp, ekıge bölınıp jarysty.
– Özım Kökşetau ölkesınıŋ tumasymyn. Bız jaqta qar qalyŋ tüsedı. Sondyqtan şaŋǧyǧa jastaiymnan äues boldym. Al Astanaǧa qonys audarǧanyma bes jyldan endı asty. Osy qalaǧa köşıp kelgelı mūndai būqaralyq jarystardyŋ eşqaisysynan qūr qalǧan emespın. Jazda jügırıp jaryssam, qysta şaŋǧy tebuden saiysqa tüsemın. Aqpan aiynda şaŋǧyşylar künıne orai ūiymdastyrylatyn şaralarǧa üzbei qatysyp kelemın. Ekı jyl qatarynan bırınşı oryn, bır ret ekınşı oryn aldym, – dedı Seiılbek Segızbaev atty aqsaqal.
Sondai-aq, ol şaŋǧy jarysynda köş basynda jüretın qariialardyŋ qatary da sirep kele jatqanyn aitady. Olardyŋ arasynda quaty kemıp, jasy seksennen asqan qarttar da bar eken. Ärdaiym aldyŋǧy orynnan körınetın bırneşe şaŋǧyşy aqsaqaldardyŋ būl jarysta boi körsetpeuınen jaŋa esımderdıŋ paida boluy mümkın.
Salauatty ömır saltyn nasihattauǧa baǧyttalǧan jarysqa qatysuǧa är audannyŋ ardagerler ūiymy öz şaŋǧyşylaryn ūsyndy. Būl jarystyŋ maqsaty jeŋıs emes, eŋ aldymen bırlık-yntymaq ekenı atalyp öttı.
Jalpy komandalyq esep boiynşa Saryarqa audanynyŋ qariialary 1-oryndy ielendı. Odan keiıngı oryn Esıl audanyna būiyrdy. Üştıktı Almaty audany tüiındedı.
Orynbek ÖTEMŪRAT
