Şıldenıŋ 2-sı küngı keşten 4-ıne qaraǧan tünge deiıngı aralyqta älem chempionatynda 1/8 finaldyŋ qalǧan 4 oiyny oinalyp, şirek finalǧa şyqqan qūramalar tolyq anyqtalyp bıttı. Būl plei-off oiyndary da osyndai teketıres aiqasqa naǧyz tözımdılerdıŋ ǧana şyǧa alatynyn körsettı.
Osy kezdesulerde 10 gol soǧyldy, 1 oiynşy alaŋnan quylyp, 18 futbolşyǧa eskertu berıldı. Sol siiaqty 1 penalti belgılenıp, ol golǧa ainaldyryldy. Matchtardyŋ 3-ı negızgı uaqytta aiaqtalsa, bıreuınıŋ soŋy penaltiler seriiasyna alyp bardy.
Būl kvartettıŋ oiyndarynda tek sensasiia ǧana oryn alǧan joq. Olarda köpşılık ūtady dep ümıt artqan komandalar sol deŋgeiden tabyla bıldı. Bıraq barlyq ūşyrasularda da keskılesken aiqastar jürıp jatty. Solardyŋ aqyrynda qarsylasyna qaraǧanda da, tabandyraq körıngen ūjym jeŋıske jettı. Bız mūny Meksikadan asa qatty basym bolmasa da, ony soqqylar däldıgımen alyp ketken Braziliianyŋ oiynynan da, Şveisariiamen 90 minut boiy tolassyz taitalasqan Şvesiianyŋ ürdısınen de, Japoniiadan 0:2 bolyp ūtylyp tūryp, eŋ soŋǧy sätte tarazy basyn özıne qarai būryp jıbergen Belgiianyŋ täjıribesınen de, aqyr soŋynda Kolumbiiany bırınşı taimda tütıp jeitındei körınıp, oiynnyŋ aiaǧyna qarai tızgının berıp qoiǧan, söitıp, ekstra-taimda öz-özıne kele almai, ony penaltiler seriiasynyŋ kömegımen ūtyp şyqqan Angliianyŋ äuselesınen de kördık.
Osymen 1/8 finaldyq oiyndar da özınıŋ märesıne jettı. Ol aldaǧy şirek finalda Urugvai – Fransiia, Braziliia – Belgiia, Resei – Horvatiia, Şvesiia – Angliia qūramalarynyŋ kezdesetınderın anyqtap berdı. Būlardyŋ bırınşısı – 6 şılde, ekınşı jäne üşınşısı – 7 şılde, al soŋǧysy 8 şılde künderı oinalady.
Endı bolǧan oiyndarǧa qatysty qysqaşa şolu jasap öteiık.
Braziliia – Meksika 2:0. Keŋ tūrǧydan alyp qaraǧanda, būl matchta asa bır qatty tartys bola qoiǧan joq. Meksikalyqtar oiynnyŋ basynda taitalastan qaitpaityndai bolyp körıngenımen, taim ortasy aua sol qarqyndarynan aiyrylyp qaldy. Şamasy, tez gol soǧyp aluǧa qūrylǧan josparlary jüzege aspaǧasyn betterı qaityp qalǧan siiaqty. Alaida būdan keiın oiyn tızgının qolǧa alǧan braziliialyqtar ony soŋyna deiın uysynan şyǧara qoimady.
Bırınşı taimda golkiper Gilermo Ochao meksikalyqtardy bırneşe goldan saqtap qaldy. Bıraq ekınşı taimnyŋ basynda «pentakampeondar» şabuylyna ol da tötep bere almady. Goldy Neimar saldy. Ol būryştama berılgennen keiın aiyp alaŋynda dopty ökşesımen Villianǧa jönelttı. Ol qaqpa alaŋyna jaqyn kelıp, arǧy baǧanǧa qarai baǧyttady. Ony Ochao ūstai almady. Oǧan arǧy jaǧynda tūrǧan Karlos Selsedo men Gabi Jezus ta jetpedı. Esesıne, sodan keiıngı aşyq jerge kelıp qalǧan Neimar dopty bos qaqpaǧa atyp jıberdı.
Matchtyŋ soŋyna qarai salynǧan ekınşı dopqa da Neimardyŋ qatysy boldy. Ol qaqpanyŋ alys baǧanyna qarai dop ūşyrdy. Ony qaǧyp almaqşy bolǧan Ochao tek sausaǧynyŋ ūşyn ǧana tigıze aldy. Sol-aq eken, odan aryda tūrǧan Roberto Firmino ekı metr jerden dopty qaqpaǧa qarai baǧyttai saldy.
Braziliia – Meksika 2:0
Goldar: Neimar (51), Roberto Firmino (88)
Belgiia – Japoniia 3:2. Eseptı kezeŋdegı eŋ tartysty, sonymen bırge aqyry qalai bıterı belgısız kezdesu osy boldy. Bıraq matchtaǧy bes goldyŋ bärı ekınşı taimda soǧyldy. Osy rette kezdesudı taim boiynşa ekıge bölıp qarastyruǧa bolady. Onyŋ bırınşı bölıgınde belgiialyqtar onşalyqty tolyq aşyla qoimady. Osydan-aq olardyŋ bır barmaqtary bügulı ekenın baiqadyq.
Japondar bolsa, qarsylastarynyŋ osy sirek şabuyldarynan jantalasa qorǧana jürıp, qarsy şabuylǧa şyǧudy ūmyt qaldyrǧan joq. Künşyǧys elı futbolşylarynyŋ būl joryqtary keide europalyqtardy tyǧyryqqa tırep tūrdy.
Al üzılısten keiın ekı jaq ta aşyq kettı. Būl oiyndaǧy qauyrttyqty arttyryp, ony qyzyqty ete tüstı. Özderınıŋ küşı basym ekenderıne senımdı belgiialyqtar osy tūsta mäselenı oŋai şeşıp tastauǧa tyrysty. Bıraq aziialyqtar tarapynan kezdesken tegeurındı qarsylyq olardyŋ būl oilaryn jüzege asyrtpady. Mūnyŋ ornyna japondardyŋ jyldam ūiymdastyratyn qarsy şabuyldary qauıptı bola berdı. Būlar tez arada golǧa da ainalyp ülgerdı. Söitıp, bar-joǧy 4 minuttyŋ ışınde olar eseptı 2:0-ge jetkızdı.
Bälki, basqa komanda bolsa, osydan keiın bırden basylyp qalar ma edı, bıraq belgiialyqtar osydan keiın qaita örşelene tüskendei äser qaldyrdy. Sondyqtan olardyŋ jappai şabuyldarynyŋ ötkırlıgı sät saiyn baiqalyp tūrdy. Äitkenmen, Romelu Lukaku bastaǧan jıgıtterdıŋ ese qaiyruy ūzap kettı. Aqyrynda öz qaqpasyna bırınşı goldyŋ tüsuıne kınälı sanalǧan Iаn Vertongen bır şabuyl kezınde «paraşiut» ädısımen dop jöneltıp, ony japondar toryna top etıp tüsırdı. Būdan keiın Maruan Fellainidıŋ eseptı teŋestıruıne köp uaqyt ketken joq.
Belgiialyqtar osy quatty qarqyndy oiynnyŋ soŋyna deiın toqtatqan joq. Būl ekı arada japondar da qarap qalmady. Alaida, soŋǧy goldy jeŋıske köbırek eŋbek sıŋırgen belgiialyqtar tüsırdı.
Belgiia – Japoniia 3:2
Goldar: Iаn Vertongen (69), Maruan Fellaini (74), Naser Şadli (90+4) – Genki Haraguti (48), Takasi İnui (52)
Şvesiia – Şveisariia 1:0. Būl kezdesu de tartyssyz bolǧan joq. Bıraq oiynnyŋ sapasy jaǧynan ortaşa dep baǧalauǧa bolady. Mūnda da soŋǧy sätke deiın kımnıŋ jeŋıske jetetını belgısız bolyp tūrdy. Degenmen, būl joly da kım ūtysqa köbırek laiyqty bolsa, sol kelesı kezeŋge ötu mümkındıgıne qol jetkızdı.
Şvesiia – Şveisariia 1:0
Gol: Emil Forsberg (66)
Kolumbiia – Angliia 1:1. Būǧan deiın aǧylşyndar älem chempionatynda üş ret oiynnan keiıngı penaltige tüsken eken. Bıraq üşeuınde de joly bolmapty. Būl joly olardy sättılık kütıp tūrdy. Al oiyn jaiyna kelsek, onyŋ bırınşı kezeŋınde Angliia qūramasy aitarlyqtai basym boldy. Olar qarsylastar alaŋyndaǧy qarbalas kezınde tärtıp būzylǧandyqtan, penalti arqyly alǧa şyqty. Ony Garri Kein tüsırıp, goldar sanyn 6-ǧa jetkızdı. Bıraq ekınşı taimda kolumbiialyqtar erık alyp kettı. Sonyŋ nätijesınde olar eseptı teŋestırıp, jeŋıp te kete jazdady.
Kolumbiia – Angliia 1:1 (over-taim 0:0, penalti 4:3)
Goldar: Erri Mina (90+3) – Garri Kein (57, penalti)
