Şolpan QOJAHMETOVA, Astana qalalyq №1 perinataldyq ortalyq bas därıgerınıŋ orynbasary
Oryngül:
– Ötken jyldyŋ aiaǧynda sızdıŋ ortalyqta bosanǧanmyn. Balamnyŋ salmaǧy 3 kelı 670 gramm, boiy 55 sm bolyp tuylǧan. 2014 jyldyŋ 2 aqpanynda perzenthanadan şyqtyq. Auruhanadan şyqqanda därıgerlerdıŋ bergen qaǧazyn joǧaltyp aldym. Ony qaita aluyma bola ma?
– Şaruaşylyq qūqyǧyndaǧy «№1 perinataldyq ortalyq» MKK sızge būl qaǧazdyŋ köşırmesın bere alady. Ol üşın ortalyqqa kelıp, jeke kuälıgıŋızben statistika bölımşesıne baruyŋyz kerek.
Baqytjan:
– Sälemetsız be, Şolpan Bütınbaiqyzy? Sızderde ıs jürgızuşı, audarmaşy nemese mūraǧatşynyŋ bos orny bar ma?
– Bügıngı künı bızdıŋ ortalyqta būl mamandyqtarǧa bos oryn joq. Degenmen, kelıp, tüiındemeŋızdı qaldyryŋyz.
Aitbala:
– Jüktılıgım boiynşa qalalyq №8 emhanada tırkelgenmın. Tūrǧylyqty mekenjaiym boiynşa sızdıŋ ortalyqta bosanuyma bola ma älde jazbaşa türde ötınış beruım kerek pe?
– Qazaqstan Respublikasynyŋ 2009 jylǧy 5 qazandaǧy «Halyq densaulyǧy jäne densaulyq saqtau jüiesı turaly» Kodeksınıŋ 88, 91-baptaryna säikes, sız özıŋız bosanatyn medisinalyq ūiymdy, sapaly ärı uaqytyly medisinalyq kömektı erkın taŋdauǧa qūqylysyz. Sonymen bırge sızdıŋ akuşer-ginekolog nemese neonatolog därıgerdı taŋdauǧa, auystyruǧa qūqyǧyŋyz bar. Al, bızdıŋ ortalyqta jüktı äielder men jas bosanǧan analarǧa akuşerlık pen ginekologiia salasynyŋ joǧary sanatty, täjıribelı, bılıktı mamandary, kafedramyzdyŋ professorlary men dosentterı medisinalyq qyzmet körsetedı.
Äigerım:
– Segız jasar ūlym bar. Odan keiın bala tūrmai qoidy. Alǧaşqy jüktılıgım jaqsy ötken. Sodan berı üş ret tüsık tastadym. Genetiktıŋ keŋesıne jügınsem be deimın. Sızdıŋ ortalyqta emdele alam ba?
– Jüktılıktı, äsırese, ony alǧaşqy kezeŋınde saqtau üşın barlyq jaǧdai qarastyrylǧan. Genetiktıŋ keŋesın aluǧa da mümkındıgıŋız bar. Qosymşa aqparattar men bailanys telefonynyŋ nömırın bızdıŋ ortalyqtyŋ saitynan (www.pc-1.kz) alasyz.
Jansaia Qanatbek:
– Sälemetsız be? №1 qalalyq perinataldyq ortalyqta spermogramma analizın tapsyruǧa bola ma jäne ol üşın qanşa aqşa töleimın?
– Jansaia, eiakuliat nemese spermogramma analizın bızdıŋ ortalyqtyŋ klinikalyq-diagnostikalyq laboratoriiasynda tapsyruyŋyzǧa bolady. Qalasaŋyz, ony aqyly negızde tapsyra alasyz. Al, eger därıgerıŋız joldama berse, kepıldendırılgen tegın medisinalyq kömektıŋ şeŋberınde būl analizdı aqysyz da tapsyruyŋyzǧa bolady. Bekıtılgen preiskurant boiynşa būl analizdıŋ baǧasy bügıngı künı morfologiiany qosa eseptegende 3000 teŋge tūrady. Qosymşa aqparattardy 43-27-25 nemese 43-27-39 telefondaryna habarlasu arqyly aluyŋyzǧa da bolady.
Şynar:
– Sälemetsızder me? Bız joldasym ekeuımız balaly boludy armandaimyz. Qaida baryp körınuımızge, emdeluımızge bolady?
– Aldymen özıŋız tūratyn jerdegı aumaqtyq emhanaǧa qaralyŋyz. Sol jerde därıgerler sızderdı tolyq tekseredı. Sodan keiın ǧana, onda da olar qajet dep tapsa, emhanadaǧy därıgerler sızdı bızdıŋ ortalyqqa joldamamen jıberedı. Sol jerdegı mamandarǧa qaralyp, emdeluıŋızge bolady.
Läzzat:
– Öskemen qalasynan habarlasyp tūrmyn. Apaiymnyŋ aiaǧy auyr. Jüktılık merzımı – 22 apta. EKO arqyly ūryqtandyrylǧan. Ekı aidan berı därıgerler tüsık tastauy mümkın dep küdıktenıp otyr. Jüktılıktıŋ besınşı aiynda merzımınen būryn bosandyru mümkın be? Astanaǧa kelıp, №1 perinataldyq ortalyqtyŋ mamandarynan keŋes aluymyzǧa bola ma?
– Ärine. Ol üşın sız +7 (7172) 43-27-55 telefonyna qoŋyrau şalu arqyly ortalyǧymyzdyŋ qabyldau-diagnostikalyq bölımşesıne habarlasyp, tolyq aqparat ala alasyz.
Aitolqyn:
– Bırınşı balamdy bosanǧanmyn. Qazır säbiım 1,5 ailyq. Joldasym jūmysta bolǧandyqtan köbıne ūzaqty künge üide özım jalǧyz qalamyn. Balam keide mazasyzdanyp jylaidy. Ne ısterımdı bılmei qinalamyn. Aityŋyzşy, qai kezde därıger şaqyrtuym kerek?
– Ärine, säbi düniege kelgennen keiın ony auyrtyp almai, ösırıp-jetkızu – öte jauapty ıs. Sondyqtan, asa mūqiiat bolyŋyz. Eger säbiıŋız omyrauyŋyzdy äzer soryp, älsızdık tanytsa nemese odan mülde bas tartsa, qol-aiaǧy salbyrap, eşteŋege zauqy soqpai, sebepsız ūzaq uaqyt toqtamai jylaityn bolsa, demalysy auyrlap, qūsyp, ışı ötken, ystyǧy 37,5°S-den joǧarylap, tıptı, tüspegen jaǧdaida jedel järdem şaqyrtqanyŋyz jön.
Güljan:
– Jüktılıgım boiynşa qalalyq № 7 emhanada eseptemın. Därıgerım №1 perinataldyq ortalyqta bosanatynymdy aitty. Aqyly palatalardyŋ täulıktık qūnyn bılgım keledı. Sonymen bırge bosanuǧa barǧanda özımmen bırge qandai zattar alyp baruym kerek, serıktesıme ne qajet?
– İä, №7 emhanaǧa tırkelgen bolsaŋyz, bızdıŋ ortalyqta bosanasyz. Al, aqyly palatalardyŋ baǧasyna kelsek, būl mäsele boiynşa ortalyǧymyzdyŋ 3-akuşerlık bölımşesıne, menedjerge 43-27-32 telefony arqyly habarlasyp nemese medisinalyq mekememızdıŋ www pc-1.kz saitynan tolyq aqparatty ala alasyz. Bosanuǧa qajettı zattardyŋ tızımı sızdıŋ jüktılık kartaŋyzda körsetılgen. Serıktesıŋız özımen bırge auystyratyn kiım jäne aiaq kiım alyp keluı kerek.
Almira:
– Otbasymyz ülken quanyşqa kenelıp jatyr. Jaqynda köpten kütken ūlymyz düniege keldı. Närestenı qalai kütu jönınde, tamaqtandyru turaly keŋırek bılgım keledı. Qandai keŋes beresız?
– Būl turaly sızge balalar därıgerı tolyq maǧlūmat beredı. Degenmen, arnaiy habarlasqanyŋyzdy eskere otyryp, qysqaşa jauap bereiın. Balany emızer aldynda anasy aldymen keudesın tazalap sabynmen juyp, taza oramalmen sürtedı, sosyn bırneşe tamşy süttı syǧyp sauyp tastau kerek, sonda emşek ürpısıne tūryp qalǧan bakteriialar şaiylyp ketedı. Jalpy, säbidı emızerde anasynyŋ dūrys jaiǧasyp otyrǧany jön. Säbi emgen kezde ernımen emşektıŋ ürpısımen qatar ainalasyndaǧy terısın de qamtuy kerek. Dem aluyna kedergı bolmauy üşın mūrnynyŋ aşyq boluyn da qadaǧalap otyryŋyz.
Äiel üşın balany emızudıŋ artyqşylyǧy köp. Mäselen, ol qanazdyq, omyrau bezınıŋ obyry, anabez obyry, eresek jastaǧy süiek aurulary siiaqty qauıp-qaterlerdı tömendetedı.
Janar Izımbetova:
– Qalalyq №1 perinataldyq ortalyqta bılıktı de bılımdı därıgerlerdıŋ jūmys ısteitınıne anyq köz jetkızıp otyrmyn. Alǧaşqy qyzymdy osy ortalyqta bosanǧanmyn. Ekınşı perzentım de osynda düniege keldı. Qazırgı zaman talabyna sai ozyq tehnologiialarmen jabdyqtalǧan klinikanyŋ mamandary qarapaiym, qaiyrymdy, täjıribelerı mol, Gippokrat antyna adal jandar bolyp şyqty. Äsırese, bas därıger Dina Amangeldıqyzyna, bas därıgerdıŋ orynbasary Şolpan Bütınbaiqyzyna, sondai-aq barlyq medisinalyq qyzmetkerlerge aitar alǧysym şeksız. Eŋbekterıŋızdıŋ jemısın körıŋızder!
– Rahmet. Böpeŋızdıŋ bauy berık bolsyn!
İndira:
– Qaiyrly kün! Jüktılıgımnıŋ merzımı – 20 apta. Qai kezde jedel järdem şaqyrtqanym dūrys?
– Eger jynys joldarynda qan aralas aǧyndy bılınse, basyŋyzdyŋ auyruy toqtamai, aiaq astynan qolyŋyz ben betıŋız ısınse, dene qyzuyŋyz 38º S-den joǧarylasa, kışı däretke otyrǧan kezde auyrlyqty sezınseŋız, ışıŋız qatty auyrsa, baiqausyzda qūlap qalyp, ışıŋızdı auyrtyp alsaŋyz bırden jedel järdem şaqyrtyŋyz.
Altynai Orynbaeva:
– Estuımşe, qalalyq № 1 perinataldyq ortalyqtyŋ janynda ana mektebı jūmys ısteidı. Oǧan qalai qatysuyma bolady?
– Tūrǧylyqty mekenjaiy boiynşa №4, №7 emhanaǧa, «Şipager» otbasylyq-därıgerlık ambulatoriiaǧa jäne bızdıŋ ortalyqqa tırkelgen aiaǧy auyr äielder ana mektebıne tegın qatysa alady. Al, basqa tılek bıldıruşıler üşın onyŋ qyzmetı – aqyly.
