Memleket basşysy Jambyl oblysynda bolǧan jarylystarǧa bailanysty şūǧyl jinalys ötkızdı.
Jiynǧa Premer-ministr, qūqyq qorǧau, qorǧanys, qauıpsızdık jäne basqa da küştık qūrylymdardyŋ basşylary qatysty.
Qasym-Jomart Toqaev Jambyl oblysynda bolǧan tötenşe oqiǧa saldarynan qaza tapqan azamattardyŋ otbasylaryna köŋıl aityp, zardap şekken adamdardyŋ tezırek sauyǧyp ketuıne tılektestık bıldırdı.
– Keşe Jambyl oblysynyŋ Baizaq audanynda tötenşe oqiǧa boldy. Qaruly Küşterımızdıŋ oq-därısı saqtalatyn qoimanyŋ bırınen ört şyqty. Artynan bırneşe jarylys boldy. Jergılıktı tūrǧyndar aman-esen. Ökınışke qarai, äskeri qyzmetşıler men qūtqaruşylar arasynda adam şyǧyny bar. Olar qyzmettık mındetın atqaru barysynda erlıkpen qaza tapty. Qaitys bolǧan azamattardyŋ otbasyna qaiǧylaryna ortaqtasyp, köŋıl aitamyn. Jaraqat alǧan adamdardyŋ tezırek sauyǧyp ketuın tıleimın, – dedı Memleket basşysy.
Prezident qaza tapqan azamattardyŋ otbasylaryna kömek körsetu boiynşa naqty tapsyrmalar berdı.
– Memlekettık uäkılettı organdar qaza tapqan azamattardyŋ otbasylaryna kömek körsetudıŋ barlyq şaralaryn qabyldauy qajet. Jūmyldyrylǧan barlyq sala mamandarynyŋ jankeştılıgınıŋ arqasynda jaǧdai baqylauǧa alynyp, odan da köp şyǧynǧa jol berılmedı. Qūtqaruşylarǧa, därıgerlerge, polisiia, prokuratura jäne äkımdık qyzmetkerlerıne alǧys aitamyn. Degenmen örttıŋ saldary qiynǧa soqty. Adamdar zardap şektı. Köptegen azamat baspanasyn tastap ketuge mäjbür boldy. Eldı mekenderdıŋ infraqūrylymyna zaqym kelıp, bırqatar ǧimarattar qirap qaldy. Osyǧan bailanysty şūǧyl şaralar qabyldandy. Bıraq älı de köp qalpyna keltıru jūmystaryn jürgızu kerek, – dedı Qasym-Jomart Toqaev.
Prezident ortalyq jäne jergılıktı organdardyŋ jūmysyn dūrys üilestıru kerek ekenın aitty. Qajetsız kedergılerdı joiyp, uaqyt ūttyrmai jedel qimyldaudy, eŋ bırınşı kezekte auyl tūrǧyndaryn öz üilerıne qaitaru şaralaryn qolǧa aludy tapsyrdy.
Taǧy bır maŋyzdy mäsele retınde apattyŋ sebepterın anyqtau qajet ekenın aitty. Mūndai jaǧdailardyŋ aldyn alu boiynşa naqty şaralar qabyldaudy tapsyrdy.
Memleket basşysy ekı jyl būryn Arysta bolǧan jarylysty eske alyp, qaru-jaraq qoimalarynda älı de şeşılmegen tüiındı mäselelerdıŋ bar ekenın aitty. Prezident Arys oqiǧasynan keiın arnaiy tapsyrma bergenın, endı osy baǧyttaǧy jūmystardy jedeldetıp aiaqtauǧa tapsyrma berdı.
Qasym-Jomart Toqaev Jambyl oblysyndaǧy tötenşe oqiǧaǧa bailanysty bırqatar şaralardy şūǧyl qolǧa aludy tapsyrdy.
– Bırınşı. Tötenşe jaǧdaidyŋ saldaryn joiu üşın vedomstvoaralyq memlekettık komissiia qūrylsyn. Oǧan Premer-ministrdıŋ orynbasary Roman Vasilevich Skliar basşylyq etsın. Roman Vasilevich, sızge qazır jinalys aiaqtalǧan soŋ Jambyl öŋırıne şūǧyl barudy tapsyramyn. Jūmystyŋ basy-qasynda bolyp, barlyq şaralardy oqiǧa ornynan ūiymdastyryŋyz. Ekınşı. Qaza bolǧan azamattardyŋ otbasyn äleumettık qorǧau jäne zardap şekken tūrǧyndarǧa kömek körsetu üşın barlyq qajettı şaralar qabyldansyn. Üşınşı. Densaulyq saqtau ministrlıgı tötenşe oqiǧa saldarynan jaraqat alǧan azamattarǧa jan-jaqty medisinalyq kömek körsetudı ūiymdastyrsyn, – dedı Memleket basşysy.
Sondai-aq Bas prokuratura men Işkı ıster ministrlıgıne oqys oqiǧanyŋ män-jaiyn jäne kınälılerdı anyqtau üşın sotqa deiıngı tergeu amaldarynyŋ mūqiiat jürgızudı qamtamasyz etudı, Işkı ıster ministrlıgı müddelı memlekettık organdarmen bırlesıp, qoǧamdyq tärtıptı, azamattardyŋ qauıpsızdıgı men dünie-mülkınıŋ saqtaluyn qamtamasyz etu üşın keşendı şaralar qabyldaudy tapsyrdy.
Ūlttyq qauıpsızdık komitetıne, Bas prokuraturaǧa jäne Işkı ıster ministrlıgı men müddelı memlekettık organdarǧa oqiǧa turaly jalǧan aqparattyŋ taraluyna jol bermeu üşın şaralar qabyldau jönınde tapsyrmalar berıldı.
Jiynda, Qorǧanys ministrı Nūrlan Ermekbaev, Tötenşe jaǧdailar ministrı Iýrii İlin, Jambyl oblysynyŋ äkımı Berdıbek Saparbaev, Işkı ıster ministrı Erlan Tūrǧymbaev jäne Bas prokuror Ǧizat Nūrdäuletov baiandama jasady.
