Astana künı merekesınde jauǧan jaŋbyr jarty saǧat ışınde elordanyŋ bıraz aimaǧyn suǧa toltyrǧany belgılı. Sol künı bar-joǧy 25 minut ışınde segız millimetr kölemınde ylǧal tüsken eken. Būl qalyptaǧy normadan bırneşe ese joǧary. Sonyŋ saldarynan qaladaǧy kommunaldyq qyzmet aiaǧynan tık tūryp, küşeitılgen rejimde jūmys ısteuge mäjbür boldy.
Mereke künderı elordada esepsız jauǧan jauynnan jinalǧan sudy soruǧa jüz jaqty mamandandyrylǧan tehnika, 2 jyljymaly sorǧy stansa, 7 motopompa, 21 sorǧy siiaqty qūral men tehnikalar jūmyldyrylǧan bolatyn. Nätijesınde ekı saǧat kölemınde jauynnyŋ saldary joiyldy.
Qazırgı uaqytta jaŋbyr suyn aǧyzatyn kärız qūrylysy qalai jürıp jatyr? Qaladaǧy kommunaldyq qyzmet su basu qaupın aldyn aluda qandai ıster atqaruda? Osy mäselenıŋ jai-japsaryn bılu maqsatynda Astana qalalyq Kommunaldyq şaruaşylyq basqarmasy bastyǧynyŋ orynbasary Timur Äbijanovqa bırneşe saual joldadyq.
– Būl mäselege qatysty qala äkımınıŋ özı jaqynda jan-jaqty aityp öttı. Negızınde, qaladaǧy su basu qaupın tolyqtai joiu üşın üş jyldyq arnaiy baǧdarlama qajet. Qala äkımı osy baǧytta naqty tapsyrmalar berdı. Qazırdıŋ özınde negızgı jobalary jasaluda. Özderıŋız bılesızder, osydan otyz-qyryq jyl būryn tūrǧyzylǧan üilerdıŋ janynan qardyŋ, jaŋbyrdyŋ suyn aǧyzatyn arnaiy qūbyrlar salynbaǧan. Qazır sonyŋ zardabyn tartyp otyrmyz. Al sol jaǧalaudaǧy su aǧyzatyn qūbyrlardyŋ quaty tömendeu bolyp qaldy. Öitkenı, qala ai saiyn ülkeiıp, kölemı artyp keledı. Qazırgı kezde №31 jäne №27 tazartu qūrylystary ıske qosyldy, jyl soŋyna deiın su aǧyzatyn jaŋa kollektor paidalanuǧa berıledı, – dep tüsındırdı Timur Jūmajanūly.
Mamandardyŋ aituynşa, jaŋa su aǧyzatyn kollektor ıske qosylǧanda, biylǧy jyldyŋ aiaǧyna deiın sol jaǧalaudy su basu qaupı tolyqtai joiylady eken. Al jalpy qalany mūndai qauıpten qūtqaru üşın kemı ekı-üş jyl qajet bolady. Qala äkımı Äset İsekeşev te qalalyq «Nūr Otan» partiiasynyŋ kezekten tys konferensiiasyndaǧy bır üzılıste su aǧyzatyn qūbyrlar salu – äkımdıktıŋ eŋ maŋyzdy jūmystarynyŋ bırı bolatynyn aityp ötken edı. Sol sebepten qala boiynşa tūraqty su būru jüielerı qūrylysyn josparlau baǧytynda naqty jūmystar qolǧa alyna bastaǧan. Biylǧy jyly ekı tazartu qūrylymyn jäne bır su aǧyzatyn kollektor qūrylysyn aiaqtau josparlanǧan. Sol kezde jaŋbyr jausa, suǧa lyq tolatyn Tūran daŋǧyly men Qabanbai batyr daŋǧyly mūndai azaptan qūtylady. Jalpy, elordanyŋ sol jaǧalau audanynda keler jylǧa deiın su basu qaupı tolyqtai joiylmaq. Ekı-üş jyl şamasynda, būiyrtsa, Astana kölemınde mūndai mäsele tolyq şeşımın tabatyn bolady.
Meŋdolla NŪRYMŪLY
