Astanada QR Täuelsızdıgınıŋ 25 jyldyǧyna arnalǧan «Quatty öŋır – quatty Qazaqstan» baǧdarlamasynyŋ aiasynda Soltüstık Qazaqstan oblysynyŋ künderı ötıp jatyr. Bügın taŋnan berı «Han şatyr» sauda-oiyn-sauyq ortalyǧy alaŋynda Qyzyljar aimaǧynan elordaǧa jetkızılgen auyl şaruaşylyǧy önımderınıŋ saudasy qyzu jürgızılude. Saudamen qatar sändık-qoldanbaly öner şeberlerınıŋ körmesı ūiymdastyrylyp, qyzyljarlyq önerpazdar halyqtyŋ qūlaq qūryşyn qandyruda.
Soltüstık Qazaqstan oblysynyŋ sauda sörelerın aralaǧanda azyq-tülıktıŋ qai audannan äkelıngenın anyqtaityn bannerlerdıŋ özı köz süisıntedı. Şal aqyn, Maǧjan Jūmabaev, Şoqan Uälihanov, Jambyl, Ǧabit Müsırepov ataulary täuelsızdık jyldary öŋırdıŋ bıraz qazaqylanǧanynan habar beredı.
Qyzyljarlyqtar Astanaǧa 700 tonnan astam önım jetkızıptı. Sonyŋ ışınde 95 tonna et, 10 tonna şūjyq önımderı, 24 tonna süt önımderı, 450 tonna kartop pen basqa da kökönıs, 20 tonna balyq, 10 tonna makaron önımderı, 16 tonna bal, 100 tonna ūn jäne basqa da azyq-tülık türlerı bar. Jalpy alǧanda järmeŋkege öŋırden 100-den astam şaruaşylyq pen öŋdeuşı käsıporyndar qatysuda.
– Astana tūrǧyndary Soltüstık Qazaqstan oblysynyŋ järmeŋkesın jyl saiyn asyǧa kütedı. Osy öŋır järmeŋkenı joǧary deŋgeide ūiymdastyrudy dästürge ainaldyrdy. Ony özderıŋız de körıp tūrsyzdar, qyzyljarlyqtar saudamen qatar konserttık baǧdarlamany da qyzyqty etıp qūryp, qonaqjailylyǧyn tanytyp, halyqty dämmen de syilauda. Būdan soŋ kezek Aqmola oblysyna keledı. Astanamen körşıles aimaq biylǧy järmeŋkelerdı tüiındeidı. Būl şaralarda azyq-tülık naryqtaǧy baǧadan 15-20 paiyzǧa tömen saudalanuymen qatar, mūndaǧy atmosfera da köŋılge jaǧymdy bolady. Astanaǧa elımızdıŋ är öŋırınen halyq jinalǧanyn bılesızder. Osy künderı astanalyq atanǧan olar ädette osyndai järmeŋkelerge jerlesterımen qauyşuǧa keledı, – deidı Astana qalasy äkımınıŋ orynbasary Malika Bektūrova.
Qala basşysy orynbasarynyŋ sözınıŋ dälelındei, Taiynşa audany tıkken kiız üidıŋ maŋaiyna barǧanymyzda halyqqa ystyq palau men bauyrsaq ülestırılıp jatqanyn kördık. Osylaişa är audan bır-bır qyzyq şara ūiymdastyrypty. Mäselen, Maǧjan Jūmabaev audanynyŋ Gülmaida Manaqbaeva atty tūrǧyny zeinetkerlıkke şyqqannan soŋ monşaqtardy öru önerımen ainalysa bastapty. Äliia Ryspaeva bolsa, körpe, jastyq siiaqty ūlttyq qolöner būiymdaryn tıgedı eken. Dmitrii Napadov temırden tüiın tüigen şeber bolyp şyqty.
Ǧabit Müsırepov audanynyŋ qolöner şeberlerınıŋ qolynan şyqqan üi qūstarynyŋ müsınderı bızge tırı siiaqty bolyp körındı. Aiyrtauy audanynyŋ quyrşaqtary da közdı qyzyqtyrdy.
Soltüstık öŋırı elordaǧa ettı molynan jetkızıptı. Jylqy etı 1250 teŋgeden, siyr etı 1100 teŋgeden, qoi etı 1050 teŋgeden saudalanuda. Būǧan qosa qaz ben üirek etınıŋ baǧasy 1200-1500 teŋge aralyǧynda. Et qoiylǧan sörelerdıŋ janynda: «Et tamaşa eken, qap, mūzdatqyşym tolyp qap edı» nemese «Semız et eken, bıraq anam ondai ettı jemeidı» degen sözderdı estıp qaldyq. Būdan soŋ dorbasyn etke toltyryp, säl ärırek tūrǧan aǧamyzdyŋ janyna baryp, järmeŋkeden alǧan äserın bıldık.
«Är apta saiyn järmeŋkege kelemın. Äsırese, qyzyljarlyqtar järmeŋkenı jaqsy ūiymdastyrypty. Mūndaǧy azyq-tülık baǧasy qala bazarlaryndaǧy baǧaǧa qaraǧanda arzan. Özım jylqynyŋ da, siyrdyŋ da, qoidyŋ etın de satyp aldym. Qazaqqa semız et kerek qoi, menı sol qyzyqtyrdy. Arasynda jeŋıl et bolsyn dep bır tauyqty da qostym» deidı Astananyŋ baiyrǧy tūrǧyny Sailaubek Aidarhanūly.
Soltüstık Qazaqstan oblysynyŋ järmeŋkesı bügın saǧat 18.00-ge deiın jalǧasady. Al erteŋ saǧat 9.00-den bastap 15.00-ge deiın ötedı.
Sondai-aq, bügın saǧat 17.00-de Beibıtşılık jäne kelısım saraiynda «Maǧjan elınen – elorda törıne» atty öŋırdıŋ üzdık öner ūjymdarynyŋ konsertı ūiymdastyrylady.
Amanǧali QALJANOV
