H toby: Polşa. Senegal. Kolumbiia. Japoniia
Qūramynda bırde-bır älem chempiony joq jalǧyz top osy eken. Qalǧan toptardyŋ bärınde bar. Bıraq soǧan qaramastan, mamandar būl kvartetke «Şielınıstı şoǧyr» degen at berıptı. Mūndaǧylardyŋ şama-şaryqtary, şynynda, bır-bırımen şendes siiaqty. Būdan tört jyl aldyn jarqyrap şyqqan Kolumbiia būl joly da qyzyqty körınedı. Qatarynda Robert Levandovski syndy jūldyzdy alǧa ūstaǧan Polşa men «Liverpulde» lider bolyp jürgen Manesı bar Senegal da turnirde baryn salady. Sol siiaqty samurailarǧa tän qaitpas qaisarlyǧy basym japondar üşın de toptan şyǧu bırınşı kezektegı mındet bolǧaly tūr.
Polşa qūramasy
Poliak qūramasy 2006 jyldan keiın bırınşı ret älem chempionatynyŋ finaldyq bölıgıne joldama alyp otyr. Būǧan komanda köşbasşysy Levandovski soqqan goldardyŋ kömegı az bolǧan joq. Osynyŋ arqasynda komanda özınen keiıngı Daniia jamaǧatynan Kopengagende 0:4 esebımen ūtylǧanyna qaramastan, 5 ūpai alǧa ketıp qaldy.
Polşa ötken ǧasyrdyŋ 1974 jäne 1982 jyldary erekşe közge tüsıp, mundialdıŋ qola jüldesın jeŋıp alǧan bolatyn. Bıraq Europa chempionatyna alǧaş ret 2008 jyly ǧana «joly tüstı».
Poliaktar joǧarydaǧy tabystarynan bölek, 1972 jyly Olimpiadanyŋ altyn medalın jeŋıp aldy, 1976 jäne 1992 jyldary onyŋ finalynda jeŋıldı. Olar būl joly älem chempionatyna 8-ınşı märte qatysady.
Komandanyŋ bas mergenı Robert Levandovski Europa aimaǧyndaǧy ırıkteu turnirınde 2018 jyly 16 dop salyp, Kriştianu Ronaldudan bır gol asyp kettı.
Senegal qūramasy
Senegal būl chempionatqa äupırımmen keldı. Sebebı ekınşı toptyq turnirde Oŋtüstık Afrika respublikasy jasaǧynan ūtylyp, pozisiiasyn bıraz älsıretıp aldy. Bıraq FİFA sol matchqa qazylyq etken töreşıge «oiyn nätijesın özgertetın penaltidı oilap tapty» degen aiyp taǧyp, kezdesudı qaita ötkızdırdı. Sonda senegaldyqtar myqty ekenderın däleldep berdı.
Būl eldıŋ qūramasy 2002 jyly toptaǧy bırınşı oiynynda sol kezde älemde dürıldep tūrǧan fransuzdardy 1:0 etıp tıze büktırıp, urugvailyqtar men dattardyŋ arasynan alǧa şyqty. Būdan keiın 1/8 finalda şvedterdı qaǧyp tastady. Şirek finalda türıkterge qosymşa uaqytta jol berdı. Söitıp, Kamerunnan keiın (1990) chempionattyŋ osy kezeŋıne deiın jetken ekınşı afrikalyq qūrama atandy.
Senegal qūrlyqtaǧy barynşa joǧary tabysyna 2002 jyly qol jetkızıp, Afrika ūlttar kubogynyŋ finalynda Kamerunǧa penalti seriiasynan ese jıberdı. Ol biyl älem chempionatyna ekınşı märte kele jatyr.
Kolumbiia qūramasy
Kolumbiialyqtar 2014 jyly älem chempionatynda şirek finalǧa deiın barǧanymen, būl joly qatarǧa äzer ılıktı. Ol ırıkteu turnirınıŋ soŋǧy turynda Perumen qonaqta 1:1 esebımen teŋ oinauy arqasynda 4-orynǧa taban tırep, chempionatqa joldama alǧandar sapynan tabyldy. Komanda būǧan deiın qatarynan 4 ret ūtyldy. Būl qūrama liderı Hames Rodrigestıŋ sol kezderı babynda bolmauynan oryn aldy. Bıraq Limadaǧy soŋǧy kezdesude maŋyzdy goldy soqqan da sonyŋ özı boldy.
Kolumbiia altynşy kezek mundialǧa qatysqaly tūr. Ol 2001 jyly Amerika kubogyn jeŋıp alǧan.
Japoniia qūramasy
Asyǧys şeşım qabyldaudan saq jüretın japondar chempionat bastaluǧa tura ekı ai qalǧanda qūramanyŋ bas jattyqtyruşysy Vahid Halilhodjichtı almastyrdy. Resmi habarlama boiynşa, federasiia basşylyǧy būǧan Ukraina (1:2) jäne Mali (1:1) komandalarymen ötkızılgen joldastyq kezdesu kezınde baiqalǧan bapker men oiynşylar arasyndaǧy kelıspeuşılık sebep bolǧan.
Japon futbolşylary bosniialyq mamannyŋ basşylyǧymen Aziia ırıkteu tobynda bırınşı orynǧa şyqty. Onyŋ öz alaŋynda Saud Arabiiasy men Avstraliiany ūtuy mūnda şeşuşı röl atqardy. Qūrama 1998 jyldan berı osymen qatarynan altynşy älem chempionatyna bara jatyr. Sonyŋ ışınde 2002 jyly Koreia men Japoniiada ötken dodada toptan şyǧa aldy.
Künşyǧys elınıŋ komandasy 1992, 2000, 2004, 2011 jyldary Aziia kubogyn jeŋıp alǧan.
