Qazaqstan Respublikasy Parlamentı Senatynyŋ deputaty Bibıgül Jeksenbai «Amanat» partiiasy qalalyq filialynyŋ jäne qalalyq qūrylys basqarmasynyŋ ökılderımen bırge elordadaǧy eŋ köne, bırneşe jyldan berı apattyq jaǧdaiyna bailanysty jabylǧan Q.Mūŋaitpasov atyndaǧy ortalyq stadionda bolyp, sport ortalyǧynyŋ jaŋa qūrylys jobasymen tanysty.
Stadionǧa bastapqyda rekonstruksiia jürgızıp, tek kürdelı jöndeu jūmystary josparlanǧan edı. Alaida keiınırek älemdık standarttarǧa sai, UEFA talaptary boiynşa futbol bırınşılıkterın de ötkızuge bolatyndai tolyqqandy 5 myŋ oryndyq stadion salu jobalandy. Joba qūny 13,5 mlrd teŋgenı qūraidy. Küzde qūrylys jūmystaryn biudjetten qarjylandyru mäselesı talqylanuy kerek. Joba boiynşa tek futbol ǧana emes, stadion aimaǧynda jyl on ekı ai boiy balalar men jasöspırımderdıŋ ärtürlı sport türlerı boiynşa sportpen ainalysuyna mümkındık qarastyrylǧan. Esıldıŋ oŋ jaǧalauynda ornalasqan audan tūrǧyndary üşın sport keşenderı öte tapşy.
Senator bılımdı, tärbielı ärı denı sau ūrpaq – ūlttyŋ eŋ qymbat bailyǧy. Olai bolsa, balalar men jasöspırımderdıŋ oqumen qatar, öner üirenıp, sportpen şūǧyldanyp, jan-jaqty jetıluıne qolaily jaǧdai jasau – memlekettıŋ moinyndaǧy boryşy ekenın aitty. «El Prezidentı būqaralyq sportty damytudy memlekettıŋ äleumettık saiasatyndaǧy maŋyzdy basymdyqtardyŋ bırı retınde belgılep otyr. Memleket basşysy Qasym-Jomart Toqaev VIII sailanǧan Parlamenttıŋ bırınşı sessiiasynyŋ aşyluynda söilegen sözınde de būqaralyq sportty damytudyŋ maŋyzy zor ekenın basa aitty. Sondyqtan elımızde būqaralyq sportty damytu basty nazarda bolady» dedı B.Jeksenbai.
Kezdesu barysynda senator Astanada qūrylysy josparlanǧan basqa da nysandar men şeşıluı tiıs mäseleler boiynşa aqparat aldy.
