Bügıngı äŋgımemız – tarihtaǧy tanymal tūlǧalardyŋ erekşe ädetterı jaily.
Fransuz qolbasşysy Napoleon Bonapart öte tez tamaqtanatyn bolǧan. Qolbasşy bır uaqytta sorpadan da, qoiu tamaqtan da, desertten de däm tatyp, on minut ötpei-aq üstel basynan tūryp ketedı eken. Bır qyzyǧy, ol ünemı jalǧyz auqattanǧandy ūnatypty.
Al suretşı Salvador Dalidıŋ ädetı tıpten qyzyq. Ol tüstenıp bolǧan soŋ oryndyqqa otyrǧan küiı bes-on minuttai köz şyrymyn aludy ädetke ainaldyrypty. Ūiyqtar aldynda sol qolynyŋ sūq sausaǧyna jezden jasalǧan kılttı ılıp, aiaq jaǧyna temır tostaǧandy qoiatyn bolǧan. Közı ılınıp bara jatqanda qolyndaǧy kıltı tostaǧanǧa tüsıp, sonyŋ dauysynan oianady eken. Dalidyŋ aituynşa, mūndai bes-on minuttyq ūiqy adamdy tez sergıtıp, şabyttandyratyn körınedı.
Einşteinnıŋ eşqaşan şūlyq kimegenın bıletın be edıŋız? Ūly ǧalym şūlyqty tük qajetsınbeptı. Osyny jasyru üşın saltanatty jiyndarǧa ädeiı qonyşy ūzyn etıktermen barǧan eken.
Fransuz jazuşysy Onore de Balzak öz şyǧarmalaryn tek tünde jazǧan. Sondyqtan kofenı tym köp ışken. Balzaktyŋ qoljazbalaryndaǧy kofenıŋ ızderı – sonyŋ aiǧaǧy bolsa kerek. Kofenıŋ äserınen ol tapjylmai 48 saǧat boiy jūmys ıstegen. Aqyry būl ädetı jazuşynyŋ tübıne jetken.
Saiasatker Stalin tym qarapaiym kiınıptı. Ol bır kiımdı şeşpesten ūzaq uaqyt boiy jüre bergen eken. Qairatkerdıŋ oqqaǧary bolǧan Aleksei Rybin bylai jazǧan: «Onyŋ bır ǧana tufliı boldy. Aiaq kiımnıŋ terısı jalbyrap, ökşesı jelınıp qalǧan. Stalin mūnymen jūmysta da, teatrda da, el aldynda da eş qysylmai jüre berdı. Bırde oǧan jaŋa tufli satyp alyp, kereuetınıŋ tübıne qoidyq ta, eskısın alyp kettık». Alaida, olardyŋ oiy ıske aspapty. Ūiqydan oianǧan Stalin özınıŋ būrynǧy tufliın tez arada qaita äkelıp berulerın būiyryp, aşulanǧan eken.
Botagöz MARATQYZY
Materialdy “Astana aqşamy” gazetınıŋ astana-akshamy.kz resmi saityna sılteme jasaǧanda ǧana paidalanuǧa rūqsat etıledı.
