SUBŪRQAQ – ŞOMYLATYN JER EMES
Qalalyq jaǧajaida bır mezgılde 50 bala qatar şomyla alatyn balalarǧa arnalǧan suy taiaz akvapark bar. Odan basqa qanşama jabyq basseinder bolsa da, balalar subūrqaqtarda şomylatyn ädetın qoiar emes, jaman ädettıŋ aqyry jūqpaly ındetke jetkızetının eskerer emes.
Tıptı, «Şomyluǧa bolmaidy!» degen eskertpenı de elemeidı. Keseldıŋ qaterı jaiynda sanitarlyq därıgerlerdıŋ qadaǧalap aituynan kemdık joq. Olardyŋ mälımetterıne qaraǧanda, jyl saiyn jaz ailarynda enterovirustyq infeksiiamen auyrǧandardyŋ sany artyp ketedı eken. Būl jūqpaly aurudyŋ taraluy künnıŋ qatty qyzuymen tyǧyz bailanysty. Sodan da aurudyŋ asqynuynyŋ şaryqtau şegı mausym, şılde, tamyz ailaryna tura keledı. Biylǧy jazdyŋ ystyq boluyna qarai, balalar arasyndaǧy enterovirustyq infeksiiaǧa ūşyraǧandar faktısı jiı tırkelıp otyr. Tek mamyr aiynda ǧana infeksiia jūqtyrdy degen küdıkpen 46 bala därıgerlık tekseruden ötıp, onyŋ otyzy zerthanalyq taldaudan keiın rastalǧan. Syrqattanǧandardyŋ bärı – 14 jasqa deiıngı jasöspırımder. Olardyŋ alpys paiyzy subūrqaqtarda şomylyp, aurudy sonda jūqtyrǧany belgılı bolyp otyr.
Osyǧan orai, därıgerler «jasöspırımderdıŋ demalys uaqytyn qalai ötkızetının qadaǧalau qajet» deidı. Olardyŋ tek qana rūqsat etılgen jerlerde şomyluyn jıtı baqylau kerek. Qaladaǧy subūrqaqtardyŋ qauıptı jäne şomylatyn jer emes ekenın aityp tüsındıru – eresekterdıŋ mındetı. «Jūqpaly ındet astan da keledı» deidı därıgerler. Jeke basynyŋ tazalyǧy, tamaq jer aldynda qolyn tazalap juyp, jemıs-jidektı de mūqiiat juyp, ystyq sumen şaiyp aludyŋ qajettıgıne män beru kerek. Osyndai qarapaiym erejelerdı saqtaǧanda kez kelgen auru sızdı ainalyp ötedı.