Sybailastyq bar jerde, sapaly qūrylys joq
Elorda äkımdıgınde qūrylys salasyndaǧy sybailas jemqorlyqtyŋ aldyn alu mäselesıne qatysty «döŋgelek üstel» öttı. Astana qalasy boiynşa Memlekettık säulet-qūrylys baqylau jäne lisenziialau departamentınıŋ ūiymdastyruymen ötken şaraǧa qalanyŋ bırqatar basqarmalary men qūrylys jäne jobalau kompaniialarynyŋ ökılderı qatysty.
Astana qalasy boiynşa memlekettık säulet-qūrylys baqylau jäne lisenziialau departamentınıŋ direktory Qairat Bisembaev qūrylys salasyndaǧy sybailas jemqorlyqqa jol bermes üşın memlekettık qyzmetkerler arasynda tüsındıru jūmystaryn jetıldıru qajettıgıne nazar audardy. Mäselen, jyl basynan berı elordalyq qarjy poliseilerı 64 jemqorlyq qylmysty anyqtaǧan. Zaŋbūzuşylyqqa jol bergen Astana qalasy boiynşa Tötenşe jaǧdailar departamentınıŋ 75 qyzmetkerı jäne Qylmystyq atqaru jüiesı departamentınıŋ ekı mamany jūmystan şyǧarylǧan. Ekonomikalyq jäne sybailas jemqorlyqqa qarsy küres departamentınıŋ ökılı Nauan Jünısovtıŋ aituynşa, jyl basynan berı ışkı ıster organdarynyŋ bırneşe qyzmetkerı qylmystyq jauapqa tartylǧan. «Onyŋ ışınde türlı qūrylymdardyŋ jetekşılerı kezdesedı. Mäselen, Astana qalasy boiynşa Qylmystyq atqaru jüiesı departamentı basşysynyŋ orynbasary Meirambekov, Şortandy qalasy Işkı ıster bölımı basşysynyŋ orynbasary Bigahmetov, Kölıktegı ışkı ıster departamentı tyl basşysynyŋ orynbasary Ospanov jäne Almaty jäne Saryarqa audandyq Işkı ıster organdarynyŋ qyzmetkerlerı de bar» – deidı ol.
Jiynda Memlekettık qyzmet ısterı agenttıgınıŋ Astana qalasy boiynşa departamentınıŋ basşysy Tılegen Qaskin Tärtıptık keŋes otyrystarynda qaralǧan mäselelerdı atap öttı. Elbasynyŋ sybailas jemqorlyqpen ymyrasyz küres mäselesı jaily tapsyrmalaryn oryndauda aumaqtyq jäne jergılıktı atqaruşy memlekettık organdardyŋ jūmysyna keŋınen toqtaldy.
Soŋǧy alty aidyŋ ışınde Tärtıptık keŋes ötkızgen tört otyrysta barlyǧy 15 ıs qaralǧan eken. Keŋes otyrysynyŋ qorytyndysy boiynşa toǧyz lauazymdy tūlǧa jauapkerşılıkke tartylǧan. Onyŋ ışınde 5 qyzmetkerge qataŋ sögıs berılgen. Bır adam qyzmetıne tolyq säikes emestıgı turaly eskertu alsa, üş qyzmetker atqaratyn lauazymynan bosatylǧan körınedı.
Jiyn soŋynda qūrylys kompaniialarynyŋ ökılderı de öz oilarymen bölıstı. Sybailas jemqorlyq bolǧan jerde sapaly qūrylys jürgızılmeitının alǧa tartqan olar būl mäselege bilık tarapynan qadaǧalau jūmystaryn barynşa küşeitu kerektıgın aitty.
Gülmira AIMAǦANBET