Elımızdıŋ Täuelsızdıgı turaly konstitusiialyq zaŋ – el egemendıgınıŋ alǧaşqy qūjaty qabyldanyp, halyq quanǧan sät tarih betterıne altyn ärıptermen jazylary sözsız. Bız būl künge qanşama qajyrly eŋbekpen, ülken ümıt-senımmen jetken edık. Sol uaqytta kün-tün demei, uaqytpen sanaspai iyq tırestırıp, üzeŋgı qaǧystyra qyzmet etken azamattardyŋ bügınde qatary sirep bara jatqany ökınıştı. Osy oraida Qazaqstan Respublikasy Joǧarǧy Keŋesınıŋ XII şaqyrylymdaǧy deputaty, memleket jäne qoǧam qairatkerı Quanyş AITAHANŪLYMEN kezdesıp, sol tarihi kün turaly äserımen bölısuın sūraǧan edık.
– 1990 jyly Qazaq KSR Joǧarǧy Keŋesınıŋ (keiınnen Qazaqstan Respublikasynyŋ Joǧarǧy Keŋesı) deputaty boldym. 1991 jylǧy 10 jeltoqsanda Qazaq KSR-ın Qazaqstan Respublikasy dep atau turaly zaŋ, älı esımde, 16 jeltoqsanda keşkı 18:15-te «Qazaqstan Respublikasynyŋ memlekettık täuelsızdıgı turaly» Qazaqstan Respublikasynyŋ Konstitusiialyq zaŋy qabyldandy. Sol tarihi sätte men de ışınde boldym, deputat retınde qol köterıp, dauys berdım. Joǧarǧy Keŋes Töraǧasy Serıkbolsyn Äbdıldin tribunadan söz söiledı, artynşa änūran oryndaldy, zaldaǧy 360 deputat, ükımet müşelerı, şeteldık diplomattar bar – barlyǧymyz ornymyzdan tık köterıldık. Osy tarihi sätte qatty tolqyp, tebırenıp, quanyştan közımızden jas aqty. Qaltamdaǧy oramaldy alaiyn degenım sol edı, oŋ jaǧymda tūrǧan Altynbek Särsenbaevqa közım tüstı, ol da tolqyp, jylap tūr eken, – deidı Quanyş Aitahanūly bızben äŋgımesınde.
Ärine, täuelsızdık degen ūly ūǧym ǧoi, qanşama ūlt pen ūlys öz täuelsızdıgın armandaitynyn, egemendıgı joq elder baryn eske alsaq, osyǧan şükır deimız. Jaratqannyŋ qalauymen, qantögıssız kelgen täuelsızdıgımız, KSRO qūramynan şyqqan sätımız – barlyǧy da ülken oqiǧa retınde tarihtyŋ törınen oryn alary sözsız. Qazır de sol täuelsızdıgımızdı saqtap qalu, nyǧaitu jolynda qanşama adam eŋbektenıp jatyr, osyny da ūmytpaǧan abzal.
– Täuelsızdık künı – ūlttyŋ ūly merekesı, memleket tarihyndaǧy asa maŋyzdy, aituly mereke, būl künde qanşama azamatymyzdyŋ bılım-bılıgı, qajyr-qairaty, maŋdai terı men ūltjandy peiılı jatyr deseŋşı! Yntymaq-bırlıgınıŋ arqasynda Qazaqstan tarihi örleu, äleumettık tūraqtylyq pen ūltaralyq tatulyqtyŋ mekenı bolyp qalyptasty. Bügınde Prezident Qasym-Jomart Toqaevtyŋ basşylyǧymen Ädılettı Qazaqstandy qūru jolynda aianbai eŋbek etudemız. Osy jolda barşa otandasymyz ülken tabystarǧa jetıp, denı sau, otbasy aman bolsyn! Täuelsızdıgımız baiandy, mäŋgılık bolǧai! – degen Quanyş Aitahanūly elge aqjarma tılegın jetkızdı.
Şynynda da, täuelsızdık bızge oŋai kelmedı. Qanşama adam, qanşama tūlǧa osy ızgı jolda qūrban boldy, qanşama maman el igılıgıne talmai qyzmet ettı. Sol kezdegı eŋ alǧaş täuelsızdıgımız turaly zaŋdy qabyldaǧandar qatarynda bolǧan tūlǧalar jaily älı de köp närse jazylary, aitylary haq. Är salanyŋ täjıribelı jüirıgınen, elge tanymal tūlǧadan qūralǧan Joǧarǧy Keŋes öz qyzmetın joǧary käsıbi şeberlıkpen atqardy. Salalarǧa qatysty kölemdı, keşendı, mazmūndy-maǧynaly zaŋdar qabyldandy, el ışınde türlı ıs-şara ūiymdastyrylyp, şetelmen dostyq qarym-qatynas ornady. Mūnyŋ bärı – täuelsız Qazaqstannyŋ aiaǧynan tık tūryp, el bolyp ketuıne negızdelgen maŋyzdy qadam. Eldık mäselede aianbai eŋbek etken körnektı qairatker Quanyş Aitahanūly da osy asa jauapty kezeŋde täuelsız elımızdıŋ uyǧyn qadauşylar qatarynda bolǧany, onymen sūhbat qūruymyz – bız üşın maqtanyş.
Quanyş AITAHANŪLY, memleket
jäne qoǧam qairatkerı
