TARİHŞYLAR ALDYNDA TALAI JŪMYS TŪR

 Tarihi-gumanitarlyq ǧylymdardy strategiialyq damytudyŋ basymdyqtary qandai? Tarihi bılım berudıŋ basty maqsattary nendei? Jaŋa qazaqstandyq patriotizmdı qalai qalyptastyramyz? Keşe QR Prezidentı janyndaǧy Ortalyq kommunikasiialar qyzmetınıŋ ūiymdastyruymen ūlttyq tarihty zerdeleu taqyrybyna arnalǧan baspasöz mäslihatynda osy mäseleler ortaǧa salyndy. 
Basqosu barysynda L.N. Gumilev atyndaǧy Euraziia ūlttyq uni­versitetınıŋ rektory, tarih ǧylymdarynyŋ doktory Erlan Sydyqov, Qazaqstan Respublikasy Memlekettık Eltaŋbasy avtorlarynyŋ bırı Jandarbek Mälıbekov, Qazaqstan Ūlttyq jaratylystanu ǧylymdary akademiiasynyŋ akademigı Ǧadılbek Şalahmetov, «Euraziia» gumanitarlyq ǧylymi zertteu orta­ly­ǧynyŋ direktory, tarih ǧylymdarynyŋ doktory Ziiabek Qabyldinov, «Memorialdyq aimaq» ızdestıru jasaǧynyŋ negızın qalauşy Mai­dan Qūsaiynov jur­na­listerdıŋ sūraqtaryna jauap berdı.
Qazırgı taŋda Otan ta­rihşylarynyŋ aldynda qyruar jūmys tūr. Onyŋ bırsypyrasy jönınde osy kezdesu barysynda aityldy. Erlan Bättaşūlynyŋ aituynşa, Saq däuırı tolyq zerttelıp bıtken joq. Bızdıŋ däuırımızdıŋ III-V ǧasyrlarynda Europanyŋ tırşılıgıne ülken äserın tigızgen babalarymyz – Ǧūndar tarihyn zertteude de asa zerdelılık qajet. HI-HV ǧasyrlardaǧy Qypşaq handary men sūltandarynyŋ, qolbasşylarynyŋ ta­rihtaǧy orny üs­tırt zerttelgen. HV-HVIII ǧasyrlardaǧy Qazaq handyǧynda da aqtaŋ­daq­tar jetkılıktı. Ötken jüzjyldyqtyŋ otyzynşy jyldaryndaǧy Qazaqstandaǧy aştyqtyŋ tuyndauyn da tübegeilı zertteu kerek. Ūly Otan soǧysyndaǧy qazaq­stan­dyq äskeri bölım­şe­ler­dıŋ körsetken erlıgıne de tolyqtai nazar audaryl­mai keledı. Täuelsız Qa­zaqstannyŋ şynaiy ta­rihyn jazu da kezek küttırmeitın mäsele.
L. Gumilev atyndaǧy EŪU-da «Qazaqstan ta­rih­şylarynyŋ ūlttyq kongresı» bırlestıgı qū­rylǧan. Osy ūiym bügınderı tarih mäselesı boiynşa bırqatar jūmystardy qolǧa alyp jatyr. Atap aitsaq, osy oqu ordasy janynan qyrküiek aiynda alys jäne jaqyn şeteldegı jiyrma bes elge taralatyn tarihi «MANGI EL» jurnaly jaryq köredı. Sondai-aq, biyl atalmyş universitette tarih fakultetı de aşylady.
Osy jyly elımızdıŋ joǧary oqu oryndarynyŋ tarih fakultetterıne tüsuşılerge 70-tei mem­lekettık grant bölıngen. Kelesı jyly bölınetın grant sany edäuır öse tüsedı dep josparlanuda. Bügıngı künderı Qytai, Özbekstan, Resei, Avs­triia, AQŞ, Ūlybry­ta­niia, Arab jäne taǧy basqa elde, bas-aiaǧy 20 şaqty memlekette tarihşylarymyz jür. Olar sol memleketter mūraǧattarynan elımızge qatysty derekterdı jinauda.

Amanǧali QALJANOV