Qazaqstan Respublikasy Täuelsızdıgınıŋ 30 jyldyǧy aiasynda Nūr-Sūltan qalalyq Bılım basqarmasynyŋ «Elordanyŋ bılım belesterı – täuelsız Qazaqstan keleşegı» taqyrybyndaǧy forumy öttı.
Bas qalanyŋ bılım salasy jetıstıkterıne toqtalyp, bolaşaqqa naqty ūsynystar qabyldau maqsatynda ötken būl şarada Nūr-Sūltan qalasynda bılım beru jüiesın damytudyŋ strategiialyq baǧyttary, jetken bılım salasynyŋ belesterı talqylandy. Sondai-aq innovasiialyq bılım beru jobalary, baǧdarlamalar men tehnologiialar tanystyrylyp, üzdık bılım beru ūiymdary men pedagogikalyq ūjymdar köpşılık nazaryna ūsynyldy.
– Elımızdıŋ astanasy Almatydan Esıldıŋ jaǧasyna köşıp kelgen kezde, būl öŋırde 30 şaqty ǧana mektep bar bolatyn. Balabaqşa da müldem jetıspeitın. Jalpy bılım beru deŋgeiı tömen bolatyn. Al qazır müldem kerısınşe. Oqu sapamyz ösıp, oquşy sany da köbeidı. Eldı damytu üşın bılım salasyn örkendetu kerek. Osy tūrǧydan alaǧanda, bügıngı forumnyŋ maŋyzy erekşe, – dedı forumǧa qatysqan spikerlerdıŋ bırı, Mäjılıs deputaty Ämırhan Rahymjanov.
Halyqtyŋ baqytty tūrmys keşuı halyqtyŋ bılım deŋgeiıne tıkelei qatysty. Ötken 30 jylda täuelsız Qazaqstannyŋ bılım salasy qarqyndy damyp, oqu oryndary köbeidı. Aitalyq, bügıngı bas qalamyz ornalasqan aumaqta 1991-2001 jyl aralyǧynda mektepke deiıngı 36 ūiymda 13402 bala tärbielense, 2011 jyly elordadaǧy balabaqşa sany 96-ǧa jetıp, onda 19353 bala qamtyldy, 2021 jyly bas qalamyzdaǧy 376 balabaqşada 52307 bala tälım aluda. Mūnyŋ 99-y – memlekettık, 278-ı – jekemenşık balabaqşa. Al orta bılım beru jüiesıne kelsek, 1991 jyly 35 mektepte 35568 bala bılım alsa, 2021 jyly 144 mektepte 213790 oquşy oqyp jatyr. Qazır elordada qosymşa bılım beru jüiesınde 11 ūiym jūmys ısteidı. Onyŋ altauy täuelsızdık alǧannan keiın aşylǧan. Qosymşa bılım beru oryndaryna qarasty filialdar sany 152-ge deiın artty. Al arnaiy bılım beru salasyna kelsek, 1991 jyly Selinograd qalasynda bır ǧana arnaiy bılım ordasy bolsa, bügıngı taŋda äsem astanadaǧy arnaiy bılım ordalarynyŋ sany 15-ke jettı. Qazır mūnda 3000-nan astam bala tärbie aluda. Tehnikalyq jäne käsıptık bılım beru jaǧyndaǧy körsetkışterge köz jıbersek, būl öŋırde 1991 jyly 10 kolledj jūmys jasasa, qazırgı taŋda Nūr-Sūltanda 34 käsıptık, tehnikalyq bılım beru mekemesı jūmys ısteidı.
Ötken 30 jylda oquşylardyŋ qol jetkızgen jetıstıkterı de az emes. Halyqaralyq, respublikalyq olimpiada, ǧylymi jobalar baiqauyna 1991 jyly 53 oquşy qatysyp, 29 bala jeŋımpaz atansa, 2021 jyly 381 bala qatysyp, odan 204 nūr-sūltandyq oquşy jeŋıs tuyn jelbıretıp qaitty. 2012-2021 jyldar aralyǧynda elordalyq 93 pedagog respublikalyq üzdık konkurs baiqauynyŋ qalalyq kezeŋınde top jarsa, olardyŋ arasynan 36 pedagog baiqaudyŋ respublikalyq kezeŋınde jeŋımpaz atandy.
Forumǧa QR Bılım jäne ǧylym ministrlıgı, jergılıktı atqaruşy organ ökılderı, qalalyq bılım beru jüiesınıŋ basşylary men mamandary, öŋırdıŋ jetekşı jūmys beruşılerınıŋ ökılderı, personaldy oqytu jäne damytu salasyndaǧy mamandar, qoǧamdyq ūiym, bılım beru ūiymdarynyŋ pedagogtary qatysty. Qazaqstan bılım beru ısınıŋ qūrmettı qyzmetkerı, QR Mäjılısı 5-şaqyrylymynyŋ deputaty Äsima Bimendina, Mäjılıs deputaty Ämırhan Rahymjanov, QR eŋbek sıŋırgen qyzmetkerı, ardager ūstaz Jamal Qasymbek, Ybyrai Altynsarin atyndaǧy tösbelgınıŋ iegerı Viktor Starunov şarada arnauly söz alyp, qalanyŋ oqu-aǧartu ısın damytu jönındegı oilaryn ortaǧa saldy.
https://www.youtube.com/watch?v=F_zFrk4uml8
