TENTEKTI TEZGE SALATYN – EŊBEK
Elımızde taǧdyrdyŋ jazuymen ömırın abaqtyda ötkızıp jatqandar jeterlık. Al olardy tärbieleitın – eŋbek. Astananyŋ «Kongress-holl» saraiynda ötken körmede tüzeu mekemesınde jūmys ısteitın sottalǧan azamattardyŋ būiymdary el nazaryna ūsynyldy.
Sottalǧandardy jūmyspen qamtu – kün tärtıbındegı mäsele. Olardyŋ bostandyqqa şyqqan soŋ tabys közın ızdeitını belgılı. Sondyqtan olardy tüzeu mekemesınde jürıp eŋbekke baulu qoǧam üşın paidaly bolmaq.
Astana qalasynyŋ ırgesınde ornalasqan tüzeu mekemelerınde eŋbekke jaramdy azamattardy jūmysqa ornalastyru jaqsy jolǧa qoiylǧan. Mäselen, jyl basynan berı eŋbek etuge qabıletı bar 847 adamnyŋ 599-y jūmys ısteidı. Atap aitqanda, «Eŋbek» käsıporynynda 382 adam jūmysqa tūrsa, 50 azamat şaruaşylyq qyzmetpen ainalysady.
– Elorda maŋyndaǧy ES-166/5 abaqtysynda otyrǧan 308 adam eŋbekke jaramdy. Qazırgı uaqytta olardyŋ 65,9 paiyzy eŋbekpen qamtylǧan. Olar naubaihanada, öndırıs oryndarynda jūmys ısteidı. Olar beton öndırıp, türlı būiymdar şyǧarady. Al ES-166/10 abaqtysynda 266 adam jūmys ısteidı. Sonymen bırge, mekemedegı 12 şaǧyn jäne orta käsıporyny 87 sottalǧanǧa jūmys tauyp berıp otyr, – deidı Qylmystyq atqaru jüiesı komitetı Astana qalasy boiynşa departamentınıŋ bas mamany Gülmadina Ahanova.
Tūrǧyndardyŋ nazaryna ūsynylǧan körme tauarlary közdıŋ jauyn alady. Temırden jäne aǧaştan jasalǧan būiymdar, terıden tıgılgen syrt kiımder, qūrylysqa qajettı tauarlar sapaly ekenın bıldırıp tūr.
– Sottalǧandardy jūmysqa tartu – Elbasy Joldauynda aitylǧan negızgı baǧyttardyŋ bırı. Bügıngı şaranyŋ maqsaty da olardyŋ eŋbegıne qoǧam nazaryn audarudy közdeidı. Qazırgı uaqytta sottalǧandardyŋ
71 paiyzy öndırıs oryndarynda jūmyspen qamtylǧan, – deidı «Eŋbek-Arşaly» filialynyŋ direktory Qanatbek Tūrsynūly.
Gülmira ŞARHANQYZY