Qazaq tılıne memlekettık märtebe berılgenıne tabany kürektei 30 jylǧa aiaq basty. Elbasy mınber saiyn tılge tiek ettı, qyruar qarjy jūmsaldy. Ükımet aitsa «bärı bolyp jatyr, bärı bıtıp jatyr, 2025 jyly Qazaqstan halqy 100 paiyz qazaqşa söileitın bolady» deidı.
Nätijesı qaida? Nätijesı – qaǧaz betınde ǧana. «Tılderdı damytu» jönındegı soŋǧy baǧdarlama boiynşa 2020 jyly Qazaqstan halqynyŋ 95 paiyzy qazaqşa söileuge tiıs. Mektep qazaqşa söilemei, halyq qalai qazaqşa söilemek?! Parlament qazaqşa söilemese, qaimana jūrttyŋ qazaqşasynan ne qaiyr?! 30 jylda qazaqşa daiyndalǧan jalǧyz ǧana zaŋ qabyldaǧan (Äkım Ysqaqtyŋ «Köşı-qon turaly» zaŋy) Parlamentke ne aitpaqpyz?!
Mektep qazaqşa söilemei jatyr dep kım aitady? Lauazymdylar osylai dep dürse qoia beredı. «Bügınde elordadaǧy 88 mekteptıŋ teŋ jartysy – aralas mektep. Bır aralas mekteptegı 110 synyptyŋ 97-sı – orysşa, sabaǧy orysşa, oquşysynyŋ basym bölıgı – qazaq balalary.
Bıraq jaǧy talmaityn jany qazaq, zar jaq qairatkerler taǧy da talap etıp jatyr. Senat deputaty Mūrat Baqtiiarūly biık mınberden aiqailady, «Mäjılısten qaralatyn barlyq zaŋ qazaq tılınde äzırlensın!». Bıraq hakım Abaidyŋ sözın qaitalaǧan «baiaǧy jartas» Mūrattyŋ sözın de qaitalamaitynyna kım kepıl?!
Qazaqtıldı aqparat, baspasöz jurnalisterı de basyn köterdı. Olardyŋ aituynşa, ministrlıkterdıŋ qyzmetkerlerınen qazaqşa tıl qatatyndar köp emes. Sonda qazaq tılınıŋ kösegesı qaşan kögeredı?
Bodauhan TOQANŪLY
