Tılge degen qūrmetterı erekşe
Bailyqtyŋ eŋ ülkenı – halyq arasyndaǧy dostyq. Bız osy dostyqty nyǧaityp, bır-bırımızdı qūrmettep, elımızdıŋ erteŋı üşın qyzmet etudemız. Būl – qonaqjai, bauyrmal halyq ekenımızdıŋ aiqyn körınısı. «Bölıngendı börı jeidı» degen babalar sözı tegınnen-tegın aitylmasa kerek. Bız özımızben bırge tūryp jatqan özge ūlt ökılderı jaily jaqsy pıkırdemız. Al Qazaqstanda tūryp jatqan olar bız jaily ne oilaidy eken? Özderınen sūrap bıleiık.
Astana medisina universitetı studentterı Iogeş Kumavat pen Ghaşnaiam Chodhari Ündıstannan 2016 jyldyŋ qyrküiek, qaraşa ailarynda kelıptı. Astanaǧa kelgenderıne az bolsa da, qalaǧa üirenıp, tanyp-bılıp qalǧan eken. Qazaq dostary da köp körınedı. Universitettıŋ 2-kurs studentı Iogeş Kumavat:
– Elordaǧa oqu üşın keldım. Astana medisina universitetınde jalpy medisina mamandyǧynda oqimyn. Joǧary oqu ornyna tüsetın kezde Astanany özım taŋdadym. Äleumettık jelıden äsem qalany körıp, taŋǧaldym. Eŋ alǧaş kelgenımde, kurstastarym menı jyly qarsy aldy. Äŋgımege tartyp, söileskılerı keldı. Bıraq erkın tıl tabysyp ketu maǧan qiyndyq tuǧyzdy. Qazır qazaq tılın üirenıp jatyrmyn, özıme qazaqşa söilegen ūnaidy. Qazaqtar bauyrmal, dostyqqa berık halyq eken. Salt-dästürdı, ädet-ǧūrypty ūstanatyn dostarymda qonaqta boldym. Qazaqtyŋ ūlttyq taǧamdary – et, nauryz köje, bauyrsaqtyŋ dämın eş ūmytpaspyn, – dedı.
Al Ghaşnaiam Chodhari osy qalany taŋdap, bılım alyp jatqanyna eş ökınbeitının aitady. Timur esımdı dosynyŋ arqasynda basqa balalarmen tanysyp, ortaǧa üirenısıp qalǧan eken. «Olar menı özge ūlt dep bölmedı. Aralaryna qosyp, bauyrmaldyq tanytty. Tıldı de üirenuge kömektesedı» deidı ol. «Astana saǧan nesımen körıktı?» dep sūraǧanymda «Tüngı Astana öte ädemı. «Han Şatyr», «Bäiterek» siiaqty ǧimarattar erekşe közge tüsedı» dep jauap berdı.
– Nauryz meiramyn dumandatyp toilap jürgende, aqjaulyqty apa maǧan öz batasyn berdı. Men de qarap qalmai, alǧysymdy bıldırıp, ol kısıge tättılerdı ūsyndym. Salt-dästürlerdıŋ bırazymen tanysyp ülgerdım. Tūsaukeser salty qatty ūnady. Endı ǧana jürıp kele jatqan balaǧa aq jol tıleu, aldaǧy uaqytta aldynda eşqandai kedergıge tap bolmasyn degendei tılek tıleu keremet eken, – dep sözın tüiındedı ol.
Özge ūlt ökılderımen tıldeskende bır baiqaǧanym, qazaq mädenietıne, salt-dästürge, tılge qatty qyzyǧady eken. Qazaq tılı – bai, iırımdı tıl. Naqyşyna keltırıp söileseŋ, öte ǧajap tıl. «Basqa ūltpyn, qazaq emespın» demei, Qazaqstanda tūryp, eldı, tıldı qūrmettep jatqanyna riza boldym.
Aidana JANǦABYLOVA,
№68 orta mekteptıŋ
11-synyp oquşysy