Qazaqstanda tuyp, ömır sürıp, memlekettık tıldı bılmeu – sol elge qūrmet körsetpeu. Astanadaǧy №9 emhanada ginekolog bolyp eŋbek etetın ukrain ūltynyŋ ökılı Kseniia Gurina osylai dep sanaidy. Özı Arqalyqta düniege kelgen ol bala kezden qazaq tılın jetık bılıp ösken. Sonyŋ arqasynda ol qazır kez kelgen nauqasqa ekı tılde de qyzmet körsete beredı.
29 jastaǧy jas därıger qazaqşa anyq, qatesız söileidı. Osy rette ol auylynda qazaq tılınen sabaq bergen Aizada apaiyna talapşyldyǧy üşın alǧys bıldıredı. Qazır aldyna kelgen keibır äielder oiyn orysşa jetkıze almai jatsa, memlekettık tılde söilesıp ketedı.
– Qazaqşa tıl bıluım ortaşa deŋgeide. Köp adamdardy, ärine, taŋǧaldyrady. Bıraq oǧan taŋǧalatyn eşteŋesı joq dep sanaimyn. Sebebı Qazaqstanda tuyp, ösken soŋ memlekettık tıldı bılu – ärbır azamattyŋ mındetı. Söilegende qatem bolsa, aituyn sūraimyn ainalamnan. Üirenuden eş qymsynbaimyn. 2013 jyldan berı Astanadamyn. Sol jyly medisina universitetıne oquǧa tüsıp, 2020 jyly bıtırdım. Mektepte biologiia, himiia pänderın jaqsy köretınmın jäne därıger boludy armandadym. Sol armanyma qol jetkızıp, elordada №2 emhanada eŋbek jolymdy bastadym. 2022 jyldan bastap osy emhanadamyn. Jūmysym özıme ūnaidy. Mende tırkeude 160-tan asa jüktı äiel bar. Bır künde ortaşa eseppen 25-30 äiel, keide 40 adamǧa deiın qaraluǧa keledı, – deidı ginekolog därıger.
Jyl saiyn adamdar därıgerlerdıŋ şaqyrtuymen emhanalarda skriningterden ötedı. Medisina qaryştap damyp, bır ornynda tūrmaidy. «Bolaşaqta köptegen aurulardy jeŋemız! Halqymyzdyŋ salauatty, denı sau boluy üşın densaulyq saqtau salasymen bırge adamdardyŋ özınıŋ de oi-sanasy damyp, öz densaulyǧyna jauapty bolu deŋgeiı de artuy kerek. Atap aitqanda, dūrys tamaqtanu, sportpen ainalysu, medisinalyq tekseruden uaqytynda jiı ötıp otyru – köptegen aurulardyŋ aldyn alyp, adam ömırın ūzartady. Bız öz ūrpaqtarymyzǧa osyndai sauatty äreketterımızben ülgı bolsaq» deidı därıger.
