«Somfort hotel Astana» qonaq üiınde «Qazaqstan Respublikasynyŋ Konstitusiiasy – tūraqtylyq pen damudyŋ negızı» taqyrybynda ǧylymi- täjıribelık konferensiia öttı. Konferensiiany Ata zaŋnyŋ qabyldanǧanyna 20 jyl toluyna orai Astana qalasynyŋ äkımdıgı ūiymdastyrdy.
Onyŋ jūmysyna QR Prezidentı äkımşılıgınıŋ inspektory, Astana qalasy äkımınıŋ orynbasarlary, elordanyŋ ǧylymi jäne şyǧarmaşylyq ziialy qauymynyŋ, ükımettık emes ūiymdardyŋ jäne memlekettık mekemelerdıŋ ökılderı qatysty.
– 1995 jyly jalpy halyqtyq referendumda qabyldanǧan bügıngı Ata zaŋymyz öz ömırşeŋdıgın tanytuda. Elımızdıŋ demokratiialyq jolmen damu baǧyty aiqyndaldy. Qūqyqtyq memleket qalyptastyru qaǧidalary qoǧamda jäne azamattardyŋ sanasynda tüpkılıktı bekıp, öz jemısın berude. Memlekettıŋ tiımdı damuyn qamtamasyz etken zaŋnyŋ üstemdıgı nyǧaidy. Bız bügın osy qoldanystaǧy Konstitusiianyŋ mereitoiy qarsaŋynda oi-pıkırlerımızdı ortaǧa salyp, täjıribe almasuǧa jinalyp otyrmyz, – dedı konferensiiany aşyp, jürgızgen L.N.Gumilev atyndaǧy Euraziia ūlttyq universitetınıŋ professory, zaŋ ǧylymynyŋ doktory Ermek Abdrasulov.
Al, Astana qalasy äkımınıŋ orynbasary Ermek Amanşaev öz sözınde «Konstitusiia eŋ aldymen elımızdegı tūraqtylyqtyŋ kepılı boldy. Elbasy – Ūlt köşbasşysy N.Ä.Nazarbaev täuelsızdıktıŋ alǧaşqy jyldarynan bastap-aq qoǧamdaǧy tynyştyqty, ūltaralyq tatulyqty saqtauǧa erekşe köŋıl bölıp keledı. Sonyŋ bır jarqyn aiǧaǧy onyŋ bastamasymen qūrylǧan Qazaqstan halqy assambleiasyn erekşe atap aitsaq bolady. Biyl jiyrma jyldyǧyn atap ötıp jatqan mūndai bıregei institut qazırgı kezde de elımızdegı tūraqtylyqtyŋ, beibıtşılıktıŋ saqtaluynda maŋyzdy röl atqaruda. Onyŋ qol jetken jetıstıkterı men qyzmetı älemnıŋ basqa da memleketterı üşın üirenıp, ülgı alarlyqtai därejege jetıp otyr. Būl – elımızdegı eŋ basty uaqiǧanyŋ bırı» dedı.
– Elbasy Nūrsūltan Nazarbaev «Konstitusiiany qataŋ ūstanu – būl memlekettılıktıŋ tabysty damuynyŋ jäne qoǧamdaǧy azamattyq kelısımnıŋ negızı. Ol boiynşa ömır süru – būl demokratiianyŋ eŋ joǧarǧy mektebı. Būl mektepten barlyǧymyz ötuge tiıspız» degen edı. Mıne, osy qaǧidanyŋ halyq sanasyna sıŋuıne atsalysyp jürgen azamattar barşylyq dei kelıp, Astana qalasy ädılet departamentınıŋ basşysy Qanat Musin Astana qalasy äkımınıŋ orynbasary Andrei Lukin men Qazaq memlekettık zaŋ universitetınıŋ professory Sergei Udarsevtı «Qazaqstannyŋ qūrmettı zaŋgerı» ataǧymen marapattady.
Būdan keiın «Qazaqstan Respublikasy Konstitusiiasyna engızılgen özgerıster men tolyqtyrulardyŋ erekşelıkterı» taqyrybynda Qazaqstan Respublikasy Prezidentı äkımşılıgınıŋ qūqyq qorǧau jüiesı bölımınıŋ inspektory Nikolai Tureskii, «Adam qūqy men bostandyǧynyŋ kepılı» taqyrybynda Astana qalasy prokuraturasy ardagerler keŋesınıŋ müşesı Qairat Kenjebolatov, «Mäŋgılık el» ideiasyn jüzege asyruda konstitusiialyq kepıldık» taqyrybynda Qazaqstan Respublikasy Bılım jäne ǧylym ministrlıgı Memleket tarihy institutynyŋ bas ǧylymi qyzmetkerı Erkeş Nūrpeiısov jäne t.b. baiandama jasady.
Konferensiiada jastar arasyndaǧy keibır qūqyqtyq sauatsyzdyq mäselelerı söz bolyp, mektep baǧdarlamasyna arnauly pän engızu ūsynyldy. Sondai-aq, qūqyqtyq nigilizmnyŋ aldyn alu üşın jürgızıluı tiıstı jūmystar da talqylandy.
Taŋatar TÖLEUǦALİEV
