Türkıstan, tüle! Şymkent, şyrailan!
Biylǧy jyldyŋ erekşe este qalar jaŋalyqtarynyŋ bırı – türkı jūrtyna ortaq Türkıstan qalasynyŋ oblys ortalyǧy boluy, Oŋtüstık Qazaqstan oblysynyŋ Türkıstan oblysy dep atauyn özgertuı, sonymen bırge būryn oblys ortalyǧy bolǧan Şymkenttıŋ respublikalyq maŋyzy bar qala märtebesın ielenuı.
Türkıstan qalasyn oblys ortalyǧyna ainaldyrudy kezınde ūlt qairatkerı Özbekälı Jänıbekov te armandap ötken eken. Sol arman, mıne, Qazaqstan täuelsızdıgınıŋ 27-şı jylynda jüzege asyp otyr. 2018 jyldyŋ 19 mausymy künı Prezident Nūrsūltan Nazarbaev «Qazaqstan Respublikasynyŋ äkımşılık-aumaqtyq qūrylysynyŋ keibır mäselelerı turaly» Jarlyqqa qol qoiyp, ötken ǧasyrda-aq aǧalar aŋsaǧan armandy oryndap, aidy aspanǧa şyǧardy.
«Būl äkımşılıktıŋ aumaqtyŋ qūrylymdyq özgerısterı osy öŋırdıŋ örkendeuıne tyŋ serpın beruın közdegen tarihi qūjat bolady. Oŋtüstık Qazaqstan – elımızdegı ekonomikalyq, kölık, logistikalyq, demografiialyq äleuetı zor aimaq. Biyl halqynyŋ sany millionǧa jetken Şymkent Qazaqstannyŋ eŋ ırı üş megapolisınıŋ qataryna qosyldy» dep mälımdedı sol joly Elbasy.
Astana, Almaty şaharlary sekıldı şyraily Şymkent te öz aldyna derbes, erekşe märtebelı qalaǧa ainaldy. Söitıp äkımşılık bırlık elımızdıŋ on jetınşı aimaǧy atandy.
Būl oqiǧa Alaş ruhyn aspandatqandai boldy. Öitkenı Türkıstandy tületu – ruhaniiatymyzdy, tarihymyzdy, ruhymyzdy tületu. Sonymen qatar būl respublikalyq deŋgeide erekşe nazar audaryp, damytu nysandaryn ärtaraptandyrudyŋ da bır körınısı edı. Almaty men Astana qalalaryna ǧana emes, Şymkent qalasyna köŋıl bölu arqyly, bız elımızdıŋ damu lokomotivın är aimaqtan ıske qosqaly otyrmyz. Äsırese, oblys ortalyǧyna ainalǧan Türkıstandy damytu arqyly halqy köp oŋtüstık aimaqtyŋ damyp, örkendeuıne zor serpın beretını sözsız.