Jergılıktı atqaruşy organdarynyŋ mädeni jäne genderlık qarym- qatynastardy otbasy men qoǧamda qalyptastyru şaralaryna bailanysty Astana qalalyq mäslihatynda qoǧamdyq tyŋdau öttı.
Qalalyq ışkı saiasat basqarmasynyŋ basşysy Erlan Qanalimov ötken jylǧy jūmystarǧa toqtalyp, memlekettık äleumettık tapsyrys aiasynda genderlık saiasatty jüzege asyru barysynda üş maŋyzdy joba ötkızılgenın, biyl būl jūmys jalǧasatynyn, iaǧni, äleumettık jobalar sanyn beske jetkızu josparlanyp otyrǧanyn aitty. Būl jobalardyŋ qataryna «Ūlaǧatty äulet», «Qazaq qyzy», «Üzdık otbasylyq bilbord» baiqaulary, äkeler institutyn nyǧaituǧa jäne bala tärbiesındegı äkeler rölın arttyruǧa, äielderdıŋ köşbasşylyǧyna baǧyttalǧan şaralar kırıp otyr.
Astana qalasy äkımdıgı janyndaǧy äielder ısterı jäne otbasylyq-demografiialyq saiasat jönındegı komissiianyŋ hatşysy Rimma İmanǧazinova Qazaqstan Respublikasyndaǧy 2030 jylǧa deiıngı otbasylyq jäne genderlık saiasat tūjyrymdamasyna säikes atqaryluy tiıs jūmystarǧa toqtaldy.
Onyŋ aituynşa, būl jūmystar ışkı saiasat, bılım, jastar mäselelerı jönındegı, sondai-aq, jūmyspen qamtu, eŋbek jäne äleumettık qorǧau syndy bırneşe basqarmaǧa bölıngen. Iаǧni, atalmyş basqarmalar biudjettık äkımşılerı bolyp otyr. Alaida baiandamaşynyŋ pıkırınşe, jüielı, sapaly jūmys jürgızu üşın genderlık saiasatqa qatysty ısterdı bır basqarmaǧa şoǧyrlandyru qajet. Qazırgı taŋda är basqarma özınıŋ şaralaryn jeke-jeke ötkızgennen qarjylandyru jaǧynan da qiyndyqtar tuyp jatqan körınedı.
«Mäselen, byltyr Astanada tūŋǧyş märte äkeler jiyny ötkızıldı. Būl şaraǧa biudjetten aqşa bölınbedı. Aimaqtardan 100 adamdy şaqyryp alyp, kömek sūrauǧa tura keldı. Sondai-aq, türlı beinerolikterdı, jarnamalyq aqparatty şyǧaruǧa qarjydan qysylyp otyrmyz. Sol sebepterden «Äielder köşbasşylyǧy mektebı» ekı jyl qatarynan ötkızılmedı. Qalalyq ışkı saiasat basqarmasynyŋ arqasynda biyl oǧan tiıstı qarjy bölındı» deidı Rimma İmanǧazinova.
Sonymen qatar qoǧamdyq tyŋdauda otbasy qūndylyqtaryn saqtauǧa arnalǧan, jalpy genderlık saiasatqa qatysty elordada ötetın şaralar telearnalar men radiolarda az nasihattalatyny, keibırı mülde eleusız qalatyny jönınde aityldy. Mūny Erlan Qanalimov Astana äkımdıgıne qarasty telearna nemese radio joqtyǧymen tüsındırdı. Degenmen, telearnalarmen jūmys jürgızılıp jatqanyn, şaralardyŋ köbısı demalys künderı ūiymdastyrylatyndyǧynan aqparat berılmei qalatynyn jetkızdı.
Jiyndy köterılgen mäselelerdıŋ bırı äielderdı zorlyq-zombylyqtan qorǧauǧa arnaldy. Būl jönınde baiandama jasaǧan Astana qalasynyŋ Işkı ıster departamentınıŋ äielderdı zorlyq-zombylyqtan qorǧau jönındegı aǧa inspektory Aqmaral Serıkbaeva soŋǧy üş aida «senım telefonyna» 300-ge juyq äiel habarlasqanyn, al departamentke öz aiaǧymen 60-qa jaqyn äiel şaǧymdanyp kelgenın, tärtıp saqşylarynyŋ tarapynan tiıstı şaralar qabyldanǧanyn aitty.
Jalpy, tūrmystyq janjaldarǧa qatysty qozǧalǧan ıster byltyrǧa qaraǧanda biyl köbeigen. Mäselen, ötken jyldyŋ alǧaşqy toqsanynda 187 adam jauapkerşılıkke tartylsa, biyl atalmyş merzımde 198 adamǧa jettı. Alaida osyndai janjaldardyŋ örşuıne qandai jaǧdailar sebep bolǧanyn inspektor aita almady. Tek qana ūrlyqqa qatysty ışkı ıster organdaryna köbınese äielder şaǧymdanatynyn, biyldan bastap būl ıster de äielderge qarsy jasalǧan qylmystar qataryna jatqyzylyp jürgenın jetkızdı.
Osynyŋ aldyndaǧy qalalyq mäslihattyŋ V şaqyrylymynda 2 äiel deputat bolyp sailanǧan. Al qazırgı VI şaqyrylymda olardyŋ sany üş ese ūlǧaiyp, altauǧa jettı. Qoǧamdyq tyŋdaudyŋ soŋynda osy turaly, iaǧni äielder köşbasşylyǧy jaǧynan Astanada oŋ nätije baiqalyp otyrǧany aityldy.
Amanǧali QALJANOV
