«Astana» halyqaralyq qarjy ortalyǧynyŋ (AHQO) resmi aşylu räsımı biylǧy 5 şıldede ötedı. Būl jaŋalyqty seisenbıdegı Ükımet otyrysynda AHQO-nyŋ basqaruşysy Qairat Kelımbetov jariia ettı.
«Qazaqstannyŋ elordasy – Astana qalasynyŋ 20 jyldyǧyn atap ötu aiasyndaǧy ıs-şaralar josparynyŋ şeŋberınde Memleket basşysynyŋ qatysuymen «Astana» halyqaralyq qarjy ortalyǧynyŋ resmi aşylu räsımın ötkızu josparlanǧan. Būl tūsaukeser räsımı EKSPO aumaǧyndaǧy Kongress-ortalyq ǧimaratynda biylǧy 5 şıldede ötedı. Räsımge qatysuǧa ırı halyqaralyq qarjylyq kompaniialardyŋ, damu instituttarynyŋ, qarjy ūiymdarynyŋ basşylary, atap aitqanda, Europalyq qaita qūru jäne damu bankınıŋ (EQQDB – T.T.) prezidentı Suma Chakrabarti, Blackstone Group töraǧasy Stiven Şvarsman, Aziia infraqūrylymdyq investisiialar bankınıŋ prezidentı Szin Lisiun, Dubai qarjy ortalyǧynyŋ basqaruşysy İssa Kazim jäne t.b. şaqyryldy» dedı Qairat Kelımbetov.
AHQO basqaruşysynyŋ aituynşa, resmi tūsaukeser aldynda 13-ınşı Düniejüzılık islamdyq ekonomikalyq forumyn jäne Nazarbaev ortalyǧynda AHQO-nyŋ qūqyqtyq mäseleler boiynşa alǧaşqy halyqaralyq konferensiiasyn ötkızu josparlanyp otyr. Q.Kelımbetov sondai-aq Astana qalasynyŋ kölıktık qoljetımdılıgı qarjy ortalyǧynyŋ damu deŋgeiınıŋ basty körsetkışterınıŋ bırı ekenın atap aitty. Qarjy ortalyǧyn resmi ıske qosqannan keiın būl mäsele airyqşa özektı bolmaq. «Būl oraida Qazaqstannyŋ astanasyn Şanhai, Niu-Iork, Singapur, Gonkong, Tokio, Siurih siiaqty jäne t.b. älemnıŋ eŋ ırı qarjy ortalyqtarymen tūraqty, tıkelei äue bailanystarymen qamtamasyz etu elımızdıŋ kapital naryǧyna şeteldık investisiialardy odan ärı tartuǧa qatysty mümkındıkterdı keŋeite tüsedı» dedı ol. Mäjılıs soŋynda Ükımet basşysy Baqytjan Saǧyntaev būl mäselege arnalǧan bölek otyrys ötetının eskerttı.
Tölen TILEUBAI
