Prezidenttıkke kandidat Meiram Qajyken ügıt-nasihat nauqany aiasynda Jezqazǧan mys balqytu zauytyna keldı. Ümıtker anod bölımşesınıŋ jūmysşylarymen kezdesıp, sailaualdy baǧdarlamasynyŋ basym baǧyttaryna toqtaldy. Sondai-aq ol qyzmetkerlerdıŋ sūraqtaryna jauap berdı.
Metallurgterdıŋ köpşılıgı ziiandy öndırıs ornynda jūmys ısteitındıkten, erte zeinetke şyǧu mäselesın köterıp, «qauıptı keste» ūǧymyn qaitaru qajettıgın atap öttı. Kezdesu soŋynda zauyt qyzmetkerlerı sailaualdy dodada sättılık tılep, kandidatqa jūmysşylar käsıpodaqtarynyŋ bırlıgınıŋ belgısı retınde kaska tabys ettı.
Metallurgtermen kezdesuden keiın Meiram Qajyken «Adal eŋbek KZ» JŞS-ne bardy. Būl kompaniia «Qazaqmys» korporasiiasynyŋ bastamasymen, käsıporyndarynda eŋbek jaraqatyn alǧan adamdardy jūmysqa ornalastyru maqsatynda qūrylǧan ūiym bolyp tabylady. Kezdesu barysynda ümıtker kompaniia basşylyǧymen jäne belsendılerımen tanysty. Mūnda qyzmetkerler erekşe qajettılıkterı bar adamdardy äleumettık qorǧau mäselesıne den qoidy.
