Aqmola oblysynyŋ Qorǧaljyn audanyndaǧy «Keŋbidaiyq» orta mektebınde üstel tennisınen Qazaqstannyŋ bılım beru ısınıŋ üzdıgı, ūlaǧatty ūstaz Qabden Şämşıkenov esımın eske tüsıruge arnalǧan dästürlı aşyq turnir öttı.
Jyl saiyn ötetın jarysqa audandaǧy mektep ūjymdary men Nūr-Sūltan qalasynan äuesqoi tennisşıler qatysty. Qabden Şämşıkenov bükıl sanaly ǧūmyryn Keŋbidaiyq auylyndaǧy orta mektepte ötkızgen. Eŋbek jolyn qatardaǧy mūǧalım bolyp bastap, jiyrma jylǧa juyq mektep direktory qyzmetın atqarǧan. Ūlaǧatty ūstaz ötken ǧasyrdyŋ jetpısınşı jyldary kezektı bır eŋbek demalysyn Qyrym kurortynda ötkızgende üstel tennisın körıp, özı üirenıp, keterınde tapsyrys berıp, bırneşe üstel tennisın jabdyqtarymen bırge auyl mektebıne alǧyzady. Sodan berı osy auylda, audan boiynşa da üstel tennisı köpşılıktıŋ qyzyǧyp şūǧyldanatyn sport türıne ainalyp kete beredı.
Al biylǧy jarysta «Keŋbidaiyq» orta mektebı 1-orynǧa ie bolsa, «Janteke» orta mektebı – ekınşı, Qorǧaljyn mektep-gimnaziiasy üşınşı orynnan körındı. Jarys jeŋımpazdary men jüldegerlerıne diplomdar, medaldar jäne baǧaly syilyqtar tapsyryldy.
