Keşe L.Gumilev atyndaǧy Euraziia ūlttyq universitetınde qalalyq Tılderdı damytu basqarmasynyŋ ūiytqy boluymen orystyŋ ūly aqyny A.S.Puşkinnıŋ tuǧan künıne orai QR eŋbek sıŋırgen ärtısı Kenjeǧali Myrjyqbaidyŋ «Abai jäne Puşkin» atty än keşı öttı.
Abai topyraǧynda tuyp, Puşkin elınde bılım alǧan änşı ekı ūly tūlǧanyŋ sözderıne jazylǧan qazaq jäne orys kompozitorlarynyŋ vokaldyq şyǧarmalaryn oryndady. Dästürge ainalǧan būl konserttıŋ biylǧy konsertmeisterı Liubov Glinka Kenjeǧali Myrjyqbaidyŋ özı aitqandai, onymen bırge sahnada bırınşı ret öner körsetıp otyr. «Şynymdy aitsam, Liubov üşın qobaljydym. Süiemeldeu degen oŋai emes. Bıraq, özınıŋ mındetın jaqsy atqaryp şyqty» deidı änşı. Bır jarym saǧat boiy zor dauysta bırese äuelete, bırese şattana, endı bırde mūŋaia şyrqalǧan 18 än tyŋdarmandy erıksız baurap aldy. Poeziia qūdıretın tüsınıp, sözdıŋ siqyryn tereŋ sezıne bıletın örelı önerpaz är ännıŋ basynda Abai men Puşkin öleŋderınen üzındı şumaqtardy mänerlep oqyp otyrdy. Būl onyŋ özındık stilı ıspettı. «Erkeǧali Rahmadiev esıme erıksız tüsıp tūr. Osy sahnada şyǧarmaşylyq keşın ötkızgen edık. Sonda ol «qanşa körermen jinaldy eken?» dep sūrady. «Şamamen 600-700 adam» dedım men. «Mıne, estı studentterdıŋ esınde qalady» dedı. Sol siiaqty klassikalyq şyǧarmalar oryndalatyn būl taqyryptyq konserttıŋ jügı auyr. Öitkenı Abai men Puşkindı tüsınu üşın öre kerek» dep, Erkeǧali Rahmadievtıŋ «Qazaǧym, qairan jūrtym» änın oryndady. Osy än tyŋdarmannyŋ zor qoşemetıne bölengenı bırden baiqaldy. Sebebı, änşı Abai aqynnyŋ öleŋındegı är sözdı jürekten ötkızıp aitqanda, ūly aqynnyŋ aşynǧan dauysy, halqyna küiıngen aşy sözı tolyqtai aşyldy. «Qazaǧym» degen bır ǧana sözdı sozyp aitqannyŋ özınde tūla boiyŋ şymyrlap ketedı.
Erlan Sydyqov, Erbol Tıleşov, Serık Tūrǧynbekūly, Ǧadılbek Şalahmetov syndy ziialy qauym ökılderı sahna törıne şyǧyp, Abai men Puşkin şyǧarmalarynyŋ üilesımdı ündestıgı jaiynda söz qozǧap, äserlı äŋgımeler aitty. Keş soŋynda Ǧadılbek Şalahmetov qalyŋ köpşılıkke bylai dedı: «Menıŋ paiymdauymşa, Abaidyŋ eŋ «jandy» eskertkışı – Mäskeude. Tür-älpetı dälme-däl berılgendei. Al, Puşkinnıŋ qalyptan tys eŋ erkın eskertkışı – Astanada, osy universitet aldynda. Bır aiaǧyn köterıp, sekırıp bara jatqandai. Būl şabyttanyp, oiǧa bır öleŋ kelgendıgın, jaŋa oi tabylǧandyǧyn bıldıredı. Puşkin özıne degen rizaşylyǧyn kündelıgındegı «Ai da Puşkin!» tırkesımen jetkızedı. Al, qazaqtar «Aida, Puşkin!» dep basqa maǧynada qoldanady. Sol siiaqty sızder de, aidap jürıp, jaŋalyqtar aşuǧa tyrysyŋdar».
Mädina JAQYP
