Jaqynda Qazaqstan Respublikasy Ūlttyq Olimpiada komitetınıŋ bastamasymen «Altyn samǧau-2019» ūlttyq sport syilyǧynyŋ iegerlerı ataldy. Jyl boiy halyqaralyq jarystarda el namysyn qorǧap, joǧary jetıstıkke jetken sportşylar men bapkerlerge qūrmet körsetıldı.
Üzdıkter 10 nominasiia boiynşa ırıktelıp, laureattar awards.olimpic.kz saitynda dauys beru arqyly taŋdalǧan. Demek, dauys beruge barşaǧa bırdei mümkındık berılgen. Jalpy aitqanda, üzdıkter tügeldei dūrys taŋdaldy deuge negız bar.
Degenmen bır nominasiiada ekıūdai pıkır tuyndaǧanyn aitqymyz keledı. Mäselen, «Jazǧy sport türlerı boiynşa üzdık bapker» syilyǧyna erkın küresten ūlttyq qūramanyŋ bas bapkerı Äset Serıkbaev laiyqty dep tabylypty. Bıle bılsek, biylǧy ötken olimpiadalyq sport türlerı boiynşa älem chempionattaryna (2019 jyly 38 älem chempionaty öttı) qatysqan sportşylarymyzdyŋ arasynan bır-aq sportşymyz älem chempiony ataǧyn jeŋıp alypty. Ol – boksşy Bekzat Nūrdäuletov! Sondai-aq bokstan ūlttyq qūrama jaqsy nätije körsetkenı (1 altyn, 1 kümıs, 4 qola medal) belgılı. Mıne, osy tūsta älem chempionyn daiyndaǧan sportşynyŋ bapkerı nege üzdık bolmady degen oi tuyndaǧan edı.
Al endı küreske keletın bolsaq, elordamyzda ötken älem chempionatynda küres türlerı boiynşa 30 salmaqta älem chempiony ataqtary sarapqa salyndy. Jaqsy, jülde aldyq, lisenziia aldyq. Şynymyzdy aitsaq, quanǧanymyzben, ışımızde bır ökınıştıŋ qalǧanyn nesıne jasyraiyq? Sözdıŋ toqeterı – altyn bolmady, älem chempiony şyqpady. Sol baiaǧy Jaqsylyq Üşkempırov, Däulet Tūrlyhanov, Baqtiiar Baiseiıtovtıŋ altyndaryn eske aludan asa almadyq. Şyny kerek, küres türlerınen älem chempiony ataǧyn soŋǧy ret osydan 26 jyl būryn Mhitar Manukian jeŋıp alǧan eken.
Oidy oi qozǧaidy. Üzdık sportşy men üzdık bapker qalai taŋdalady? Negızı, būl şeşımdı ūlttyq sport federasiialarynyŋ basşylary, ūlttyq qūramalardyŋ bas bapkerlerı, sporttyq komandalardyŋ kapitandary, sonymen qatar sport jurnalisterı jasaǧan jön bolar edı dep oilaimyz. Al bır sait arqyly üzdıktı taŋdau dūrys emes sekıldı. Öitkenı saittyŋ mälımetın tüzetetın, köbeitetın, azaitatyn, iaǧni «qūlaǧyn būraityn» mümkındıgı bolady. Osy jerde küdık te, kümän de boluyn eskergen jön siiaqty.
«Üzdık sportşy» nemese «Üzdık bapker» syilyqtary älem chempiony bolǧan sportşyǧa nemese älem chempionyn daiyndaǧan bapkerge berılmese, onda mūndai syilyqtardy belgılı bır saittyŋ üzdıgı dep ataǧanymyz dūrys bolatyn şyǧar. Keleşekte osyndai jaǧdailar eskerılse eken deimız.
