Keşe S.Seifullin atyndaǧy Agrotehnikalyq universitetınde «Üzdık jas otbasy» atty qalalyq baiqau öttı.
Otbasy künın merekeleu aiasyndaǧy būl şara erlı-zaiyptylar arasyndaǧy qarym-qatynas mädenietın, salauatty ömır salty men bala tärbiesındegı dästürlerdı nasihattauǧa baǧyttalǧan. Baiqaudyŋ ūiymdastyryluyna Astana qalasy Jastar saiasaty mäselelerı basqarmasy, «Qazaqstan Jastarynyŋ Konventı» jeke qory men QazATU ūjymy ūiytqy boldy.
Biylǧy jazda otbasy qūndylyqtary jönınde psiholog mamandardyŋ jetekşılıgımen 15 taqyryptyq treningter öttı. Eŋ belsendı astanalyq 8 jūp osy konkursqa ırıktelıp, 3 kezeŋ boiynşa özara jarysqa tüstı. Atap aitqanda, baǧdarlama «Şynyqsaŋ, şymyr bolasyŋ», «Tılaşar», «Bi bileseŋ, bızdei bile!» bölımderın qamtydy.
Alǧaşqysynda qatysuşylar aiaqtaryna qap kiıp jyldamdyqqa jügırdı, tennis dobyn jäşıkke döp tigızuden saiysty, sekırtpenı serık ettı. Al, «Tılaşar» kezeŋınde jastar jürgızuşı oqyǧan orysşa sözderdı bırden qazaqşaǧa audaryp otyrdy.
Nätijesınde barlyq tapsyrma boiynşa jüzden jüirık şyqqan Madiiar men Aiken Äbılovter şaŋyraǧy «Üzdık jas otbasy» atanyp, teledidardy qorjynǧa bailady. Ekınşı oryn Qabyldinovter otbasyna būiyrsa, Qabylbekovter üşınşı orynǧa ie boldy. Ūiymdastyruşylar tarapynan jeŋımpazdarǧa medalder men baǧaly tūrmystyq tehnika zattary syiǧa berıldı.
Mädina JAQYP
