Astanada QR Bılım jäne ǧylym ministrlıgınıŋ tıkelei bastamasymen ötkızılgen «Studentterdıŋ 100 üzdık ideiasy» atty respublikalyq konkurstyŋ jeŋımpazdary anyqtaldy.
Baiqau qoldanysqa kerektı ärı qoǧamdyq tūrǧyda maŋyzdy innovasiialyq ideialar men jobalardy anyqtauǧa baǧyttalǧan bolatyn. Jastar oǧan Qazaqstannyŋ qasiettı jerlerın brendıleu, qolaily qala ortasyn qalyptastyru, auyldyq jerdıŋ tūrmysyn jaqsartu, self-brendingtı köpşılıkke nasihattau, latyn älıpbiıne köşu, qazaq tılıne audarylǧan kıtaptarǧa degen köpşılıktıŋ qyzyǧuşylyǧyn arttyruǧa qatysty jobalaryn ūsyndy.
Jarysqa 100-den asa ötınım qabyldanǧan. Olardyŋ ışınen äl-Farabi atyndaǧy QazŪU studentterı Baljan Qarataeva men Kämila İmanǧalieva ūsynǧan «Alshy» – ūlttyq brend» jobasy I oryn aldy. Qaraǧandy ekonomikalyq universitetınıŋ studentı Altynai Joldybaidyŋ «Digital University» jobasy II orynǧa, al Pavlodar memlekettık pedagogikalyq universitetınıŋ studentı Äigerım Orazbek III orynǧa ie bolyp, baǧaly syilyqtarmen marapattaldy.
