YNTYMAQTASTYQ JÖNINDE YMYRALASTY
Būrnaǧy künı «Astana EKSPO-2017» ūlttyq kompaniiasy men «Parasat» Ūlttyq ǧylymi-tehnologiialyq holdingı jäne Soltüstık Qazaqstan oblysynyŋ äkımdıgı arasynda yntymaqtastyq turaly memorandumǧa qol qoiyldy. Qūndy qūjattar taraptar arasyndaǧy yntymaqtastyqty arttyryp, körmege qajettı jobalardy jüzege asyruǧa mümkındık beredı.
Memorandumǧa säikes, «EKSPO» körmesınde qazaqstandyq ǧalymdar düniejüzılık aldyŋǧy qatarly tehnologiialardan eş kem tüspeitın äzırlemelerın körsete alady. Qazırdıŋ özınde «Parasat» ūlttyq holdingı kün jäne jel energetikasy baǧyttary boiynşa tüzılgen jiyrmaǧa juyq baǧdarlamany qolǧa aldy. Körme aiaqtalǧan soŋ, «Astana EKSPO-2017» ūlttyq kompaniiasy ūsynǧan jobalar men maketterdıŋ tehnologiialaryn öndırıste qoldanuǧa mümkındık tuady.
«EKSPO» körmesınde qazaqstandyq ǧalymdar älem jūrtşylyǧyn qandai da bır ǧylymi jetıstıgımen taŋ qaldyrady dep aitu qiyn. Degenmen, bızdıŋ eşkımdı de beijai qaldyrmaityn, düniejüzılık aldyŋǧy qatarly tehnologiialardan kem tüspeitın jobalarymyz bar. Mäselen, Almatydaǧy fizika-tehnologiia institutymen kün säulesınen energiia alatyn panelderdı ädettegıdei äinekten emes, jūmsaq materialdardan jasau baǧytynda jūmystar jürgızıp jatyrmyz» deidı «Parasat» holdingınıŋ basqarma töraǧasy Äbdıkärım Zeinullin. Onyŋ aituynşa, otandyq ǧalymdar quaty ūzaqqa jetetın akkumuliatorlyq batareialardy jasaudy da qolǧa alǧan. «Bızde älem boiynşa sirek kezdesetın metaldardyŋ mol qory bar. Al quaty köpke jetetın «bolaşaqtyŋ» akkumuliatorlary däl osy sirek metaldar negızınde jasalady. Eger bız şikızatty da özımızden şyǧaryp, önımdı de özımız öndırsek, bäsekeles orta qalyptasyp, akkumuliatorlardyŋ baǧasy da arzandai tüsedı» deidı Ä.Zeinullin.
Osylaişa, memorandumǧa qol qoiǧan taraptar «EKSPO» körmesın qazaqstandyq ǧalymdardyŋ zerttemelerımen qamtamasyz etu üşın küş bırıktıruge niettı. Soǧan säikes, «EKSPO-2017» şeŋberınde Qazaqstan Respublikasynyŋ taza quat közderın äzırleu turaly» 2013-2017 jyldarǧa arnalǧan baǧdarlama boiynşa innovasiialyq ǧylymi-tehnikalyq jobalardy jüzege asyru jäne halyqaralyq mamandandyrylǧan körmede olardy tanystyru josparlanyp otyr.
Būdan bölek, «Astana EKSPO-2017» ūlttyq kompaniiasy Soltüstık Qazaqstan oblysy äkımdıgımen de kelısımşartqa otyrdy. Qos tarap körmede josparlanǧan jūmystardy jūmyla jüzege asyrudy közdeidı.
«Elbasy juyrda ǧana körmenıŋ qūrylysy men josparlanǧan ıs-şaralardy ötkızuge otandyq käsıpkerler atsalyssyn» dedı. Osy oraida, bız tek Soltüstık Qazaqstan oblysy ǧana emes, elımızdıŋ basqa aimaqtarymen de kelısımşartqa otyrmaqpyz» deidı «Astana EKSPO-2017» ŪK basqarma töraǧasy Talǧat Ermegiiaev. Oǧan qosa, kompaniia basşysy EKSPO-2017 aiasynda qoldanylatyn tauarlar men qyzmetterdıŋ tızımı osy jyldyŋ soŋyna deiın belgılı bolatynyn atap öttı.
Erkejan SÄTIMBEK